Aruba ta pasando den su momentonan sumamente difícil y e unico nan cu no ta sinti esaki ta e grupito liga na Mike y su partido AVP. Aruba a conoce varios gobierno entre AVP y MEP. Pa nos bisa cu AVP a haci cierto cos bon no ta cuadra cu realidad tampoco, pero ora nos buta tur cos den perspectiva e dos partidonan cu a goberna ARUBA desde nos Status Aparte na 1986 tin un diferencia di dia y anochi. 

Cuanto Arubano no a traha cas den e area di Palm Beach, Pos Abao, Bubali, Eagle, Bakval, Saliña Cerca y varios otro bario na Noord ora cu Gobierno di MEP a sigui cu e vision di  Juancho Irausquin (efm) pa haci Aruba un destinacion turistico prome cu LAGO a bandona nos pais. Esnan di AVP a hari y chercha e vision di Juancho pa awe un tal Otmar destrui esaki. Ora nos di MEP a expresa preocupacion riba e calidad di turista cu e maneho hiba pa Minister Oduber esaki a wordo tapa y ignora completamente. Awe e Minister kier pasa un ley controversial. 

MEP a buta infrastructura di Sasakiweg pa eleva e calidad di producto Aruba, trece hotelnan di calidad halto: Divi resorts, Marriott hotels y tambe a trece Condominionan di calidad halto. Tur esaki cu un budget di menos di 30 Miyon florin. Un economia creciente unda mas hende di nos region a yega y integra pa stimula y gosa di un economia unda tawata tin pa un y tur. Tawata tin poder di compra y e spinoff effect a wordo sinti den mayoria parti di Aruba. Awe nos hotelnan no por yega 70% di ocupacion cu ta buta e fenomeno di All-inclusive crece pasobra mester baha e prijs di camber di hotel combina cu Food & Beverage mas barata posible pa asina yega na un pakete mas abou.

Aruba su producto tawata di hotel tradicional (Tamarijn, Divi Divi exitoso) cu timeshares di producto halto. Wak e hoyanan di timeshare resorts. Den pasado Gobierno di MEP a percura pa target e household cu entrada halto ($60.000 y mas) pa percura pa nan por gasta placa den nos economia y crece e servicionan rond di HORECA. Lamentablemente e maneho di Minister Oduber tawata uno di turismo di rugzak cu tin entrada di MENOS cu $30.000 pa aña anto a crea un di dos fenomeno di "Other accomodations" unda cu turista no ta hospeda na AHATA hotels. Tur esaki gastando mas di 80 Miyon florin cu reformanan cu a sosode den ATA cu MEP no a logra di finalisa prome cu 2009. E hecho cu no tabatin crecemento economico na 2015 y e tantisimo atraconan rond di nos pais ta bisa cu Mike y AVP a faya, nan no a goberna cu vision pero a gasta placa pa loco sin percura pa e pueblo. Mas ley den e direccion menciona lo tranca e dinamismo di e industria y poco poco Aruba lo bira menos atractivo pa turismo di calidad.
No por tapa solo cu un dede, e Gobierno di Mike a faya cu e unico pilar economico di Aruba anto riba dje kier construi mas di 1.800 camber di hotel mas. E Gobierno aki tin cu bay cas prome cu nan destrui nos país completamente. 

Expresionnan haci den e articulo aki no necesariamente ta refleha opinion di ArenaPoliti.co