MEP ta propone pa habri Caya Betico Croes bek, pa auto core atardi y anochi 

ORANJESTAD – Lider di MEP Evelyn Wever-Croes un biaha mas a enfatisa e problemanan grandi cu e parkeermeternan a ocasiona den centro di Playa. Mas tienda den Caya Betico Croes ta serando, y mas mama y tata di famia ta perdiendo trabou.
Esaki a wordo empeora pa e parkeermeternan cu a wordo poni na september anja pasa. Nos a opone e ley cu tur nos forsa, pero e minister a insisti y e forma con e tin e 13 parlamentarionan di AVP intimida ta pone cu nan ningun ta durf di vota contra un ley di Otmar Oduber. Tur conseho pa e parkeermeter tabata negativo, pero na un forma terco “wrong and strong” minister Otmar Oduber a insisti, y lamentablemente e 13 parlamentarionan di AVP a sucumbi pa su presion.
E solucion pa trese bida bek den centro di nos cuidad ta elimina parkeermeternan cu no ta necesario. Talves por laga nan na algun caminda so cu ta realmente necesario, pero e gran mayoria mester bai.

HABRI CAYA GRANDI BEK PA AUTO ATARDI Y ANOCHI
Un otro solucion ta pa habri caya Betico Croes bek pa auto core atardi y anochi, despues cu tiendanan sera. Esey lo trese bida bek poco poco manera antes. Esaki ta un proposicion di e propio comerciantenan den caya, y hopi cuidadano ta pidi esaki tambe. MEP scuchando e dolornan cu ta biba den nos comunidad, lo traha riba e plan aki, pasobra despues cu e gobierno actual a masacra centro di nos cuidad, e revitalisacion di caya Betico Croes y pues e curason di nos comercio mester haya prioridad den e sigiente gobernacion, Lider di MEP Evelyn Wever-Croes a laga sa. 

Expresionnan haci den e articulo aki no necesariamente ta refleha opinion di ArenaPoliti.co