Diabierna ultimo ministernan Paul Croes, Alex Schwengle y Arthur Dowers a reuni cu Parlamento tocante e tema abuso sexual di menor. “Ami a trese dilanti cu 6 anja pasa nos a hiba e mesun discusion aki, y mi no ta sinti cu nos a dal un paso completo den e bon direccion, mi ta sinti cu nos ta para mesun caminda. Parlamento dia 6 di december 2010 a traha un lista di recomendacion. Pero aparentemente gobierno a pone den lachi. Y awor ta basta. Awor nos mester tuma accion urgente. No bisa mas kiko no por, bisa kiko si por. Pasobra cada dia tin victimanan di abuso sexual nobo, y cada victima ta un dimas. Nos como adultonan mester sali na defensa di nos muchanan, pero nos ta fayando nan.

Den e reunion mi a enfoca riba varios punto. Mi a pidi pa elimina e secrecía medico cu dokternan tin, algo cu nos a pidi 6 anja pasa caba, pero nada a wordo hasi. Minister Schwengle a bisa cu e ta un bon idea, pero ainda no a hasi nada al respecto. Mi a bolbe ripiti loke nos a pidi 6 anja pasa cu mester tin dokter y specialista 24 ora pa dia disponible pa atende cu e victimanan di abuso sexual mesora, y pa bin cu un ‘vertrouwensarts’. Pero esey no ta e caso awor ainda. Segun minister tin suficiente profesional caba, pues lo no hasi cambio den esaki. Pa colmo, awor minister Schwengle a bisa tambe cu e no ta kere den ‘vertrouwenarts’ y kier bin cu algo otro, pero no a bisa ki anja por spera esey. Mi a urgi tambe pa pone mas trahado social na scolnan, y equipa departamentonan manera Voogdijraad cu mas hende y material pa por duna e atencion imediatio. Lamentablemente, no tabata tin mucho atencion di parti di gobierno pa e puntonan aki.

Relaciona cu e castigonan mucho abou, nos tur sa cu esaki ta debi cu no ta cumula prueba na forma efectivo, y ta tarda pa hasi esaki. Mi a puntra kiko nos ta hasiendo pa e aspecto aki bai mas efectivo pa nos haya castigo mas halto y pa e casonan wordo atendi mas liher (ehempel caso di tata Danies). E contesta tabata cu awor gobierno ta hasiendo locual cu nos por, y si realmente mester hasi mas, mester di mas hende y no tin placa pa esey. Ningun minister a indica cu lo pone mas fondo disponible pa atende cu esaki. Tocante castigonan minimo, mi a bolbe duna un splicacion di e ley di iniciativa cu MEP a entrega na 2010, y cu te awe ta wordo boycotia pa AVP. Riba esaki no tabata tin mucho reaccion tampoco. Un otro punto cu mi a propone pa proteccion di nos muchanan, ta pa bin un registro di e abusadornan sexual, pa asina cada mayor sa unda nan ta biba. Pero gobierno a indica cu un lista asina  no por wordo publica. Mi pregunta kiko nos ta hasiendo pa rehabilita e abusadornan sexual pa evita cu nan ta bolbe abusa di yiu di hende, no a haya contesta tampoco.

Mi ta lamenta cu e reunion a conclui sin pasonan concreto con pa atende cu e problemanan. Segun cifranan di Cuerpo Policial e cantidad di abusonan sexual a redobla di 2014 pa 2015, pero gobierno no ta realisa ainda cu esey kiermeen cu nan esfuersonan tambe mester redobla. E ministernan a mustra nan preocupacion, y nan tur a conta kiko ta hasiendo caba. Pero obviamente nan no ta realisa cu locual cu nan ta hasiendo caba NO ta suficiente. Gobierno a enfatisa cu profesionalnan ta trahando hopi duro caba, y nos no ta duda esaki. Pero nos sa tambe cu profesionalnan mes ta pidi pa mas hende, mas material y mas placa pa nan por hasi nan trabou mihor, pero no ta haya oido di gobierno pa esaki. Dia nos a reuni cu profesionalnan riba e tereno di abuso sexual, nan SI a bisa mesora cu nos mester hasi mas, mester mas hende, mester mas material, mester mas placa pa por combati abuso sexual. Pero ta di lamenta cu e urgencia cu e profesionalnan SI ta sinti y cu pueblo di Aruba henter SI ta sinti, no ta wordo comparti pa e ministernan. Y e reunion a caba sin novedad.

Fraccion di MEP lo pidi mesora un reunion publico riba e tema aki, pasobra den un reunion publico SI por duna gobierno instruccion pa tuma accion awor y combari abuso sexual!

Muchanan ta mira adultonan pa nos protehe nan, pa nos evita cu nan ta wordo abusa. Pero na Aruba nos a faya. Gobierno a faya y Parlamento tambe a faya. Y mi tin berguensa di ta forma parti di un Parlamento di cual su mayoria a prefera di ignora e problema di abuso sexual, djis pa sirbi un fin politico.

Expresionnan haci den e articulo aki no necesariamente ta refleha opinion di ArenaPoliti.co