Fraccion di MEP ya casi 6 anja pasa a traha riba un proyecto di ley pa introdusi castigonan mas severo den caso di abuso sexual di muchanan. Esaki despues cu un mama balente a cumula 11 mil firma y entrega un peticion na Parlamento den nomber di 11 mil hende, pa cambia e ley y bin cu e castigonan minimo. Tur hende den nos comunidad ta sclama pa bin cu un sistema cu ta evita cu un abusador sexual ta cana liber despues di apenas algun luna, mientras cu bida di e mucha ta afecta pa semper. Lamentablemente gobierno no kier tende di hasi e castigonan mas severo y evita cu e abusador ta sali di prison mucho liher. Lider di MEP Evelyn Wever-Croes a describi e caminda di cruz cu e ley aki di MEP mester a cana y ainda ta canando, pa casi 6 anja.

“E ley a wordo entrega pa nos fraccion dia 21 april 2010. Ela bai Raad van Advies e siguiente luna, y na juli Raad van Advies a contesta cu mester hasi algun cambio, pero cu tanten no ta para den e ley kiko ta e opinion di gobierno, e ley no por continua su caminda. Na september, despues cu nos a traha riba e cambionan, e ley a wordo manda pa Minister Presidente cu e peticion pa formula un punto di bista di gobierno pa nos por finalisa e ley. Mirando cu Mike Eman no a mustra ningun interes, na  juli 2011 nos a bolbe mande, e biaha aki pa Minister di Husticia. Nos a manda mas recordatorio, tambe na Directie Wetgeving, sin embargo te dia di awe nos no por logra haya e posicion di gobierno pa asina nos keda cla cu e ley. Lamentablemente e minister cu tabata encarga cu asunto social, sra. Hooijboer-Winklaar a declara cu e tema aki tampoco tin su prioridad pasobra no tin hopi caso di abuso sexual na Aruba toch. E informacion aki NO ta corecto, pasobra nos tin informacion cu e cantidad di casonan a redobla compara di 2014 pa 2015. Mi a lamenta e actitud ey di minister Michelle Hooijboer, y e tempo ey mi a recomende pa e usa e mesun curashi y bai den Ministerraad y splica e hende hombernan den su Ministerraad cu algo mester wordo haci. Como hende muher, nos no por sigi permiti cu e hende hombernan ta nenga protección na nos muchanan. Lamentablemente awe nos ta mes leew ainda.

Muchanan ta mira adultonan pa nos protehe nan, pa nos evita cu nan ta wordo abusa. Pero na Aruba nos a faya. Gobierno a faya y Parlamento tambe a faya. Y mi tin berguensa di ta forma parti di un Parlamento di cual su mayoria a prefera di ignora e problema di abuso sexual, djis pa sirbi un fin politico.

Y mi ta cansa di tende cu NO POR. No bisami cu castigonan mas severo no por, cu castigonan minimo no por. Bisami anto kiko SI POR, pasobra un cos ta sigur, asina nos no por sigi mas”, Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co