Un di cada cuatro mucha muher y un di cada seis di mucha hombernan ta sufri algun tipo di abuso sexual. E cifranan aki ta di Unicef y ta refleha e situación alarmante cu paisnan  occidental ta pasa aden. Na Aruba no tin cifra confiable y e situacion por ta mesun alarmante mirando structura di nos comunidad, mayornan trahando pa sobrevivi, uso di alcohol y droga, famianan kibra y mescla. Ta bin acerca un cultura di miedo y un comunidad chiquito. Otro aspectonan ta nos normanan y valornan unda orguyo y berguenza ta hunga un rol. Finalmente un sistema hudicial defectuoso y sigur no efectivo pa tipo di casonan aki.   

Tur esaki ta haci cu silencio ta e resultado di mayoria di casonan. Pio ainda cu mayoria di caso ta den e nucleo di famia di e victima y e abusador ta hende di confianza. Omonan , padushi padrasto y tin biaha e propio mayornan. Hopi biaha tambe e famia mes ta proteha e abusador especialmente si e abusador ta fuente di entrada pa e famia. Segun Parlamentario mr. Juan Ady Thijsen: Abusonan sexual ta un hecho grave cu ta keda pa semper den bida di victimanan. Na Aruba tin hopi victimanan ta biba den dolor di un abuso sexual cu e victima y e e abusador so sa. Actualmente parlamento ta dunando atencion na e problematica di abuso sexual na Aruba.

Despues di reunionan cu gruponan di preocupacion y fundacionan y reunion cu commision di Salud, Social y Husticia y un bijeenkomst riba e tema di abuso sexual awor tin necesidad urgente pa un reunion publico.

Parlamentario mr. Juan Ady Thijsen ta mira diferente area di atencion pa cu casonan di abuso sexual : 1. Proceduranan den casonan di abuso sexual. 2. Instancianan involvi den casonan di abuso sexual. 3. E trato medico pa victimanan di abuso sexual 4. E trato psicologico di victimanan di abuso sexual. 5. E prevencion di abuso sexual. 6. Denuncio di casonan bieuw. 7. Tratamento pa victimanan di casonan bieuw. 8. Persecucion penal pa violadornan. 9. Castigonan fuerte pa abusadornan. 10. Databank di abusadornan sexual.

Segun Parlamentario mr. Juan Ady Thijsen ta di spera cu e asunto di abusonan sexual worde trata cu tur seriedad necesario y cu pronto tin maneho y su ehecucion na vigor riba e 10 areanan di atencion pa casonan di abuso sexual y tambe proposicionan cu a bin dilanti di gruponan di preocupacion y fundacionan. Pa esaki un reunion publico tocante abusonan sexual mester tuma lugar mas pronto cu ta posibel.

Expresionnan haci den e articulo aki no necesariamente ta refleha opinion di ArenaPoliti.co