Minister Otmar Oduber mester stop di busca confrontacion! 

ORANJESTAD – Lider di MEP Evelyn Wever-Croes a elabora riba e hecho cu den ultimo dianan fraccion di MEP ta reuniendo cu varios organisacion riba e tereno di turismo. “Un cos mi por bisa: tin hopi problema den nos turismo y e ley di all-inclusive cu e minister ta bringando p’e awor no ta soluciona casi ningun di nan. E ley di ‘all-inclusive’ ta wordo usa como capa pa tapa tur demas problema den turismo. Y esun cu tribi di cuestiona e minister, e minister ta manda otronan ataca y lastra su persona. Nunca antes mi a mira minister Otmar Oduber, ni ningun otro minister comporta nan mes di e forma asina infantile pa por logra haya un mayoria pa pasa un ley den Parlamento.

MINISTER OTMAR ODUBER TA RESPONSABEL PA E PROBLEMA DI ALL INCLUSIVE
Ta pasobra minister Otmar Oduber no tabata tin un vision, awe turismo ta den e problema cu e ta. Tur cos cu e minister hasi ta “ad hoc”. Ademas, e minister ta bisa di un banda cu e kier STOP ‘all inclusive’, pero di otro banda a aproba no menos cu 1350 camber extra na all-inclusive recientemente: Westin cu a bira Riu 450, y Bahia Prinicpe na San Nicolas 900. Si e minister ta asina tanto CONTRA ‘all inclusive’, ta con bin el’a aproba asina tanto camber extra?

MINISTER OTMAR ODUBER NO TIN VISION
Locual a resalata mas den tur e reunionnan cu nos ta hibando ta cu nos gobierno no tin vision unda nan kier hiba nos turismo. Locual nan a pone den nan programanan di gobernacion di 2009 y 2013, nan ta hasiendo net contrario. No tin un plan integral, tur cos ta “ad hoc”, y por ehempel awor cu nan ta sinti cu e maneho “ad hoc” aki a condusi na tanto ‘all inclsuive’, awor kier hiba un lucha feros pa stop esey. Tambe nos por a constata cu e minister no tin comunicacion cu esnan cu SI tin vision, y e minister ta nenga di dialoga cu esnan cu por ehecuta un vision den bienestar di nos turismo.

HOPI PROFESIONAL CU POR YUDA HIBA NOS TURISMO DEN BON DIRECCION
Nos a dialoga cu hopi profesionalnan riba e tereno aki, cu tin hopi bon idea pa atende cu e retonan cu nos tin riba tereno di turismo. Pero nan mester wordo scucha y nan opinion mester wordo balora pa gobierno. Semper turismo tabata un producto di henter nos pais, e maneho di turismo tabata wordo determina conhunto cu gremionan. E caminda cu Otmar Oduber a scohe awor di confrontacion no ta yuda ningun hende. Pesey mi ta bolbe hasi un apelacion riba minister Otmar Oduber, busca e caminda di dialogo, mi ta sigur cu bo ta sali afo.

Expresionnan haci den e articulo aki no necesariamente ta refleha opinion di ArenaPoliti.co