En realidad loke Minister di Turismo Otmar Oduber ta pensa di Parlamentario Dangui Oduber, ta cu ta aki ta trata di un politico cu mester sinti lastima pa su persona y di otro banda ta spera cu nunca e politico aki ocupa haya su mes envolvi cu turismo di nos pais.
Esaki Minister Oduber ta mustra riba otro expresion di Dangui Oduber riba turismo crucero, ya cu manera ta custumber pa algun aña caba, e miembro aki di fraccion di MEP den Parlamento, ta mensahero di desaster, guia pa negativismo y un politico cu ta anhelando pa turismo di Aruba bay malo.
“Mi ta kere cu nos tin cu sigui decepciona Dangui Oduber y henter fraccion di MEP, ya cu tur loke ta pasando cu turismo di nos pais, ta un esfuerso grandi di no solamente maneho di Gobierno di AVP, pero di tur instancia envolvi, trahadonan den e sector turistico, kendenan ta gana nan pan di cada dia cu esaki.
Ta tur e hendenan aki ta traha duro tur dia pa duna e industria turistico e desaroyo positivo cu el a conoce den ultimo seis aña, caminda a logra di lanta e sector turistico, for di e debacle cu el a sufri bou di gobernacion di tata di Dangui Oduber.
Ora cu nos a scucha Dangui papia den forma negativo riba turismo crucero, dos cos a bin na nos mente, esta cu aki ta un mucha politico cu no tin nocion di loke ta papia y no ta compronde nada di turismo crucero mundial.
Na di dos luga, y aki ta bon pa pueblo ripara y tuma bon nota di e mentalidad di Dangui y henter fraccion di MEP, ta e hecho cu su declaracion negativo riba turismo crucero a bin den menos di 24 ora cu e traspaso di Radisson Hotel pa Hilton Caribbean Hotel & Casino a tuma luga, cu ta algo grandi sin duda cu a ser logra.
Ni un palabra di pabien, ni un palabra di alegria pa trahadonan di e hotel aki, a sali for di boca di Dangui Oduber of di cualkier otro miembro di fraccion di MEP, kendenan apenas luna pasa, a bay tur caminda pa cuestiona e posibel compra di Radisson Hotel dor di RIU pa esaki bira un hotel all inclusive.
Tanto Dangui como su lider Evelyne y e otronan, abiertamente a haci declaracionnan contra di esaki, a critica maneho di mi persona como Minister di Turismo, a lansa cantidad di gritonan politico pero diripiente nan a bira mudo, nan no tin argumento mas, nan no sa kico pa bisa y tur a keda keto.
Ta pa tal motibo Dangui a mira otro atake negativo riba turismo di su pais bay perdi, ya cu simplemente e no por compronde con por tin un gobierno y un Minister, cu ta traha pa duna Aruba cosnan positivo, cosnan grandi cu gobierno di su tata no por a duna den ocho aña di gobernacion.
Ocho aña caminda KLM a reduci formalmente su vuelonan pa Aruba, cu companianan di crucero a reduci den forma inexplicabel nan bishita na nos isla y asina por menciona cantidad di otro asunto mas cu Gobierno di tata di Dangui nunca por a logra.
Kisas esaki ta e problema di Dangui, ya cu mientras cu semper el a cana den sombra di su tata den e arena politico, ta dificil pa su persona y fraccion di MEP compronde cu tin cosnan bon cu por pasa cu nos pais, contal cu tin vision y determinacion pa logra metanan grandi pa nos pais.
Tur instancia tanto na Aruba y tambe den mundo ta confirma e desaroyo di turismo di Aruba den Caribe y ta reconoce esaki, ta solamente Dangui Oduber y fraccion di MEP ta contra di progreso di turismo pa nos pais, ya cu  e mente politico di e partido geel, ta un mente politico dirigi riba famia y amigonan y no riba progreso di nos pueblo y di e pais,” Minister  di Turismo Otmar Oduber a declara.

Expresionnan haci den e articulo aki no necesariamente ta refleha opinion di ArenaPoliti.co