E argumento cu minister di asuntonan economico mr. de Meza a duna pa introduci un transaction tax pasobra Fondo desaroyo Aruba ta yegando su fin ta uno hopi fofo y den tur sentido cuestionabel. Ta importante pa enfatisa cu fin di Fondo desaroyo no necesariamente kiermeen bo tin cu bai castiga pueblo cu mas belasting y cobransanan. Gabinete Eman ta demostrando cu "cueste loke cueste" kier hisa benta mas belasting riba pueblo pa asina por logra cumpli cu su caprichonan!

Desde e existencia di FDA esaki tawata haya su fondonan di Hulanda y Aruba. E convenio a yega su fin y ta pesei Hulanda lo no pone contribucion mas. Remarcabel ta cu e landsbijdrage cu Aruba tawata inyecta den FDA tawata sali di placa di belasting di abo como cuidadano. Esaki kiermeen cu semper a saca placa di e pot general di belasting pa por a cubri proyectonan. Ta pesei e cobransa di transaction tax door di Gabinete Eman pa por bai traha projecto ta uno ridiculo y un abuso contra di pueblo!

Realidad ta keda cu e costonan di cada aña di e projectonan ppp tin efectonan negativo riba e desaroyo di nos presupuestonan riba tanto termino mediano y largo. Ta tristo cu Gabinete Eman ta sigui ignora e realidad financiero di nos pais. E ta di condena cu ta persisti castigando pueblo cu mas belasting e biaha aki cu un financial transfer levy/tax! Pueblo mester ta conciente cu for di tempo cu Fondo Desaroyo Aruba ta existi nunca a cobra extra pa por a traha projecto pasobra placa di belasting tawata bai den e fondo caba. Netamente pa esaki nos di oposicion ta considera cobransa di transaction tax un atraco riba pueblo!

Expresionnan haci den e articulo aki no necesariamente ta refleha opinion di ArenaPoliti.co