Sr. Jamie Falcoi di PARA a haci mi 5 pregunta riba maneho di nos pais. Den cuatro articulo mi ta contesta su preguntanan. Ata aki pregunta nr. 2 y mi contesta.  

Pregunta # 2  
AVP ta na fabor pa cambia e forma cu nos ta genera energia na Aruba. Enbez di uza productonan di petroleo, AVP kier uza energia di solo, biento, awa, etc. Sr. Herde por splica dicon anto ta apoya un posibel reapertura di refineria?
Contesta: AVP ta fuertemente na fabor di uzo di energia renovabel pasobra e fuente aki no ta caba nunca, e no ta susha nos naturalesa y e ta spaar nos hopi placa cu awor ta gasta pa importa productonan di petroleo pa genera energia y pa nos autonan.
AVP ta na fabor pa bolbe habri e refineria cu nos a habri'e cuatro aña pasa despues cu e a sera bou gobierno di MEP. E motibo ta cu e refoneria ta crea trabou, entrada pa hopi hende y entrada y divisa hopi balioso pa nos pais. Mescos cu den pasado nos kier pa nos base economico ta mas hancho y pa "pariba di brug" tin mas actividad economico.
Cu nos meta pa uzo di energia alternativo ta contradeci nos esfuersonan pa reapertura di e refineria ta corecto. Pero e realidad ta cu bo no por cambia e sistema di genera energia di un dia pa otro. Tampoco bo ta cambia e base di bo economia di un dia pa otro. Kier men cu mientras cu nos ta cambia e forma di genera energia y bay pa uno mas renovabel, nos mester sigui uza esun bieuw di petroleo. Mare nos por a cambia esey mes ora, nos lo a haci'e. Mescos, mare nos por a remplasa e trabou y entrada cu e refineria ta crea den un tiro. Nos lo a haci'e. E realidad ta cu esakinan ta cambionan cu rond di mundo ta tuma tempo.

EHEMPELNAN
Mientras Merca a aumenta e porcentahe di energia cu e ta genera for di solo, biento y awa enormemente den ultimo 7 aña di President Barack Obama, na mes un momento Merca a cambia di un importador di petroleo, pa un exportado di petroleo. Contradiccion? Si. Pero e cambio di fuente di energia y di economia cu Presidente Obama kier tambe ta tuma tempo. Maneha un pais pa bay dilanti ta rekeri pa traha riba mas cu un tereno na mes un momento. Mas ehempel? Hasta paisnan di medio oriente cu ta exporta crudo di petroleo ta inverti pisa den energia renovabel y den otro sectornan di economia. Pakico? Pasobra nan no kier depende di entradanan di petroleo so. Pasobra nan sa cu un dia e petroleo ta caba. Pasobra nan kier prepara nan pais pa futuro. Pesey nan ta haci tur dos hunto! Mescos nos ta haci aki na Aruba! E ta parse un contradiccion for di punto di bista di kico ta miho pa medio ambiente. Pero e ta e realidad cu no por haci un sin e otro na mes un momento. Mare nos por a cambia 100% pa energia renovabel di biaha y tene e cuponan di trabao cu e refineria ta crea y keda cu e entradanan di placa y divisa pa nos pais cu e refineria ta genera. Nos lo haci'e!

Expresionnan haci den e articulo aki no necesariamente ta refleha opinion di ArenaPoliti.co