Nos a scohe pa pone pais bek riba pia, pa despues prepar'e pa futuro.  

Via su pagina di Facebook sr. Jaime Falconi, presidente di e organisacion PARA, a haci mi 5 pregunta cu tin di haci cu maneho di nos pais. Un di e preguntanan so tin di haci cu e refineria. Ata aki e preguntanan 1 y e contesta na sr. Falconi.  

Pregunta #1  
Segun e definicion di United Nations (Brundtland 1987) sostenebilidad tambe ta nifica cu inversion awor no mag di perhudica e siguiente generacion. E debe nacional actual lo endeuda nos siguiente generacion en gran forma. Esey ta permisibel?
Contesta: Tur pais mester inverti pa bay dilanti. Tur inversion ta costa placa. Construccion di un cas pa un famia awendia ta costa entre 150 pa 300 mil florin. Dependiendo di entrada di e famia e fiansa of debe aki ta 300% di nan entrada anual. Pero esey no ta un crisis, pasobra nan tin un plan (=hypoteca) pa paga gradualmente den 20 aña. Mescos ta conta pa un pais manera Aruba. Nos a y ta fia pa inversionnan den nos pais y ta paga bek over di un periodo di 15 pa 20 aña. Esey ta e plan. Si nos no haci inversion nos pais ta stagna y bay atras enbez di bay dilanti. Inversionnan manera ta haci awor aki ta netamente pa nos jiunan y nan jiunan, pasobra nan ta haci Aruba mas capaz pa enfrenta cambionan den mundo cu ta tuma luga cu nos kier of no. Por compara e inversionnan cu nos ta haci awe cu e inversionnan cu Aruba a haci entre 1986-1989 pa crea e economia di turismo cu nos tin awe. Apesar di tur e critica y oposicion cu tabata tin e tempo ey, awe nos ta gradici cu a haci e inversionnan e tempo ey, pasobra ta di e economia di turismo ey nos tur ta biba awe. Hasta e hobencita cu segun oposicion na 1989 lo tin un debe rond di su garganta pa resto di su bida, probabelmente a bay studia cu un fiansa di Aruba y tin un carera estupendo den e economia nobo di turismo.

REALIDAD
E pensamento cu gobierno di AVP no mester a haci e INVERSIONNAN cu a haci den infrastructura pa nos pais sali for di e tripel-crisis cu MEP a laga nos pais aden, ta completamente eroneo. E acusacion cu e inversionnan cu gobierno di AVP a haci den forsa di compra di trahadornan, pensionadonan y otro gruponan vulnerabel di nos comunidad ta "malgastamento" dinplaca ta completamente irracional y ofensivo. Irracional pasobra a keda demostra cu consumo di pueblo ta tene economia ta draai. E placa cu a usa pa mehora forsa di compra di trahadornan di gobierno, pa trahadornan di sector priva, pa pensionadonan y otro gruponan, tur a bay den comercio local. Nos ta papia di masha hopi placa cu a bai den economia y alabez a yuda tene capez riba awa den tempo di crisis. E inversionnan cu a haci desde 2009 pesey a yuda a corto y ta yuda a largo plazo. Pesey por bisa cu e inversionnan ta responsabel y ta yuda haci Aruba sostenibel a largo plazo.  

Expresionnan haci den e articulo aki no necesariamente ta refleha opinion di ArenaPoliti.co