Nos a drenta e luna di november 2014 y ainda nos Pais no tin un presupuesto pa 2014 locual ta un berguensa grandi. Pero Gabinete Eman parce di no ta worry mes cu nos Pais no tin un presupuesto ya cu ningun Minister ni Parlamentario di AVP ta papia riba esaki. E unico cos cu nan ta papia di dje ta Green Conference y otro cosnan poistivo pa desvia atencion di riba e realidad mes cu e rapport di CFT ta mustra nos. Nan ta warda e temporada di Fin di Aña cu Pueblo su atencion ta na fiesta, pa bulldoze presupuesto 2014 yena cu medida pa Pueblo.

PRESUPUESTO 2014 ENTREGA LAAT
Ta bon pa corda cu Gabinete Eman a entrega e Presupuesto 2014 mas di 9 luna laat na Parlamento di Aruba y pa colmo cu un seyo irealistico di Raad van Advies. E mayoria den Parlamento a pone tur conseho di Raad van Advies un banda y a aproba un prespuesto yena cu mas di 100 miyon na medida pa Pueblo. Pero Hulanda no por a tolera mas mal gobernacion na Aruba y a exigi pa bin un claridad financiero por medio di un investigacion di CFT promer cu e Presupuesto 2014 wordo firma pa Gobernador di Aruba. Di e manera aki mas tardansa a surgi pa nos Pais por tin un presupuesto pa 2014.

KB Y CFT
Minister Mike Eman tabata sa cu e no tabata tin scapatoria mas y na 2013 caba ela firma cu Hulanda pa e investigacion di CFT wordo haci, pero ta ora cu e la cuminsa gaña e Pueblo di Aruba cu no ta berdad cu CFT lo bin investiga su mal maneho financiero, Hulanda a manda un KB pa obliga Minister Eman pa cumpli cu su mesun palabra. Un berguensa pa nos Pais cu a bira mas grandi na momento cu Minister Eman a bay den welga di hamber. E investigacion di CFT a wordo boycotea pa Gabinete Eman y asina a tarda mas pa CFT por a keda cla cu su investigacion. Pero na september 2014 e rapport di CFT a bira conoci y asina Pueblo a haya sa con Gabinete Eman a abusa di e fondonan financiero di e Pais aki te na e extremo di redobla nos debe externo den solamente 5 aña di gobernacion. Gabinete Eman awor mester bay tuma un cantidad di medida mas pa asina por presenta un presupuesto realistico pa 2014 y pesey nan no sa con nan ta caba di hinca e Presupuesto 2014 den otro y esaki ta causando mas tardansa.

DESVIA ATENCION CU GREEN CONFERENCE, VERFMENTO DEN BARIO Y WARDA FIN DI AñA
Tur esten Ministernan y Parlamentarionan di AVP ta buscando tur sorto di manera pa desvia atencion di Pueblo door di papia solamente cosnan positivo di e Green Conference cu a tuma lugar na unda a firma un cantidad di MOU cu lo mester ta positivo pa Pueblo di Aruba. Puro show ya cu niun rato nan ta duna splicacion cuanto e conferencia aki ta costa y di unda a saca placa pa paga pa nan. Niun caminda nan a splica ki resultado e conferencia aki tabata tin pa crea negoshi y cupo di trabou pa esnan biba na Aruba. Banda di esaki nos Minister Eman ta sinta desvia atencion mustrando potret bunita di verfmento den barrio enves di splica e Pais aki pakiko ainda nos no tin un Presupuesto pa 2014 y cual ta tur e medidanan cu elo introduci. Tur ta sinta warda pa e temporada di Fin di Aña ora cu Pueblo su atencion ta na fiesta, pa asina bulldoze e Presupuesto 2014 yena cu medida riba lomba di Pueblo.

2 november 2014

Expresionnan haci den e articulo aki no necesariamente ta refleha opinion di ArenaPoliti.co