Na fin di 2010 nos ex Minister di Finanzas, sr De Meza, a comete e pifia di keda sin ahusta e cobransa di loon y inkomstenbelasting pa 2011 na inflacion manera ley ta prescirbi. Door di esaki e pagador di belasting a paga mas belasting cu ley ta permiti. Awor pa no coregi e eror aki y paga Pueblo su placa bek, Gabinete Eman a dicidi di core cambia ley.

Ainda nos por corda con Pueblo di Aruba a bay masalmente den bezwaar contra e cobransa ilegal di loon y inkomstenbelasting di 2011, mandando nan carta di obheccion na Belastingdienst. Pero ordo a bin di halto pa hinca e cartanan di bezwaar aki den cashi y pa no atende cu nan. Algun persona corectamente a bay dilanti di Huez pa e ilegalidad y tardansa aki y Huez a dicta cu Minister de Meza mester cumpli cu ley aplicando e alivio di inflacion pa Pueblo. Pero e Minister a pone tur cos un banda y a sigi su caminda sin paga Pueblo su placa bek y tampoco adapta e tabelnan di loon y imkomstenbelasting manera ley ta stipula. Di e manera aki pa capricho di un Minister a perhudica Pueblo su catera y a dania tur e sistema administrativo di Belastingdienst pa locual ta trata e tabelnan corecto pa cobransa di loon y inkomstenbelasting.

Awor enves cu a coregi e erornan aki Gabinete Eman a djies haci cambio den e ley poniendo tabelnan cu no ta coregi conforme ley. Di e manera aki y cu sosten di 13 parlamentario, Gabinete Eman a libra di mester atende e cartanan di bezwaar di 2011 y paga Pueblo bek e belasting cobra ilegalmente. Pa colmo di e manera aki Gabinete Eman mes a percura pa un choas administrativo mas grandi den Belastingdienst cu na fin di dia ta perhudica nos Pueblo tambe.

Ta un lastima cu Fraccion di AVP a vota pro pa haci e ilegalidad aki legal. Di e manera aki enves di yuda nan ta perhudica e Pueblo di Aruba.

8 november 2014

Expresionnan haci den e articulo aki no necesariamente ta refleha opinion di ArenaPoliti.co