Resultadonan positivo basa riba e strategia pa atrae mas turista afluente di Merca 

Luna di juli a marca un otro luna positivo pa nos turismo. Por menciona cu pa lo cual ta trata e cifra total di turistanan cu ta keda Aruba te cu e luna di juli pa e aña aki a marca un crecemento di 15.8% compara cu 2014 di cual 8.2% ta representa e mercado di Merca.

Oficina di Turismo conhuntamente cu Ministerio di Turismo ta trahando duro pa por atrae mas turista afluente pa nos isla specialmente di e mercado Mericano. Esaki ta e bishitantenan cu tin como entrada di 100 mil Dollar pa aña. Parti di e esfuerso ta un campaña di mercadeo digital y dirigi riba e mercado en cuestion, di cual nos por mira su efectonan positivo den e ultimo cifranan aki.

Lo cual cu sigur tambe tin su impacto grandi riba e cifranan positivo di turismo ta e cantidad di vuelonan y cuponan di asiento adicional pa nos isla. No ta un secreto cu nos aeropuerto ta atendiendo cu un fluho grandi di pasaheronan diario di Merca. diferente aerolinea for di e pais aki tin un of mas vuelo diario pa nos isla. Esaki sin menciona nos companianan local cu tambe recientemente a haci nan vuelonan inaugural pa Merca.

Tur ta contribui cu pa luna di juli nos a conoce un crecemento di e mercado Mericano di 10.3% compara cu juli 2014. Por menciona cu pa luna di juli Aruba a yama bon bini na un cantidad di 109.251 bishitante cual a conduci na un aumento di 13.9% compara cu e aña anterior. Esaki ta inclui mercado Latino Americano cu a subi cu 23.8% y Europa tambe cu a subi cu 6.3%.

Ministerio di Turismo conhuntamente cu tur e entidadnan turistico lo continua cu e esfuersonan pa sigura continuacion di e tendencianan positivo aki como resultado pa nos turismo.

Expresionnan haci den e articulo aki no necesariamente ta refleha opinion di ArenaPoliti.co