Oranjestad – Un delegacion di Aruba consistiendo di Prome Minister Eman, Ministernan Sevinger y de Meza a biaha pa Hulanda den fin di siman pa eynan discuti un posibel reapertura di e refineria na San Nicolas, mirando e desaroyonan di ultimo tempo. “Envolvimento di Reino Hulandes den esaki ta crucial, tanto den apoyo pa e decisionnan cu nos ta bay tuma, como tambe pa loke ta e sosten den conocemento y experticio cu tin aki y Europa pa procesonan complica manera esaki”, Eman a bisa den un declaracion for di Hulanda.  

“Nos ta aki pa pone gobierno Hulandes na altura di e desaroyonan rond un posibel reapertura di e refineria na Aruba.” E delegacion a papia diamars cu Ministernan Bert Koenders di Asuntonan Exterior y cu Minister Ronald Plasterk di Relacionnan di Reino y Asuntonan Interior. Diahuebs tin un encuentro cu Prome Minister Mark Rutte riba agenda. “Nos ta aprecia nan envolvimento den e asunto aki masha tanto mes,” Eman a bisa. Interes di e compania Citgo Petroleum Corporation di Houston den e refineria na San Nicolas ta motibo di e encuentro y discusionnan cu mandatarionan Hulandes.

Doño di e refineria Valero a anuncia su ciere na 2009 despues di un disputa serio cu e gobierno di e tempo ey, pero despues di varios negociacion cu e gobierno cu a caba di tuma rienda – Gabinete Mike Eman I, a logra wanta e refineria habri pa algun tempo mas. Na 2012 Valero a dicidi di para su actividadnan di produccion y for di e momento ey gobierno di Aruba a bay en busca di un otro operador pa e refineria. A hinca masha hopi esfuerso den negociacionnan cu diferente candidato cu a mustra interes pa asina por a tene e refineria habri. Durante henter e periodo dificil ey gobierno di Aruba a haya ayudo y sosten di Ministerio di Asuntonan Exterior di Hulanda envolviendo nan embahadanan den e paisnan unda tabata negosha cu posibel cumpradonan di e refineria. Mirando e esfuersonan haci dor di e Ministerio aki y e embahadanan Prome Minister a haya cu ta na su luga pa informa Minister Koenders cu como resultado di nan empeñonan anterior e empresa Citgo a duna di conoce di tin interes serio pa start bek cu actividadnan di produccion di e refineria.  

Eman a splica cu te awor e sosten di Hulanda tabata di vital importancia. “Nos kier pa Reino sigui sostene nos cu conocemento tecnico y experticio den tuma e decision aki. Con cu bay bin e ta un decision cu tin consecuencianan grandi pa futuro di nos isla.”, Eman a accentua. Discuti e tema aki cu mandatarionan Hulandes pa Eman ta algo masha normal. “Actualmente ta asina cu mas y mas paisnan ta traha hunto riba temanan grandi manera medio ambiente y durabilidad. Experticio di Hulanda pa traha analisis y calcula riesgonan di siguridad ta necesario. Nos mester pone banda di otro e bentaha y desbentahanan di un banda reapertura y di otro banda un ciere definitivo. Laga nos ta hopi cla si cu esaki ainda no e caso. Por lo pronto ta trata aki di un acuerdo cu nos ta bay firma pa studia si reapertura di e refineria ta un opcion. Si ta asina anto e ora ta papia y discuti e decision final.”

E decision asina ta wordo tuma cu envolvimento di Parlamento. Den esey Eman kier ta hopi cla. “Ta pesey mes cu nos ta bay Parlamento asina cu nos ta bek pa informa e miembronan di loke nos a papia aki. Cu nan nos ta sigui den deliberacion encuanto futuro di Aruba.” Henter e bululu pa loke ta e combersacionnan cu gobierno Hulandes Prome Minister Eman ta haya comprendibel, pero cu e lo a malinforma votadornan si ta algo cu e ta haya di mas. “Nos tin un situacion completamente otro cu na 2009 of 2013. Aruba ta  hayando un nomber internacionalmente como un isla duradero. Un reputacion y nomber cu por wordo daña si sin mas nos scoge pa reapurtura di e refineria. Esaki tambe tin un contexto internacional.” Eman a bisa cu ta pesey mes cu nan ta asina satisfecho cu Reino kier sostene e proceso pa yega na  e miho decision.

Expresionnan haci den e articulo aki no necesariamente ta refleha opinion di ArenaPoliti.co