Gobierno di Aruba a haya mandato di Pueblo pa desaroyo henter nos pais. Esey ta inclui San Nicolas. Gobierno di AVP a habri e refeneria cu tabata sera un biaha caba. Oposicion tabata contra. Awor parlamento a pidi gobierno den forma di e mocion di AVP cu sosten di mayoria grandi den Parlamento, pa purba habri e refeneria un biaha mas. Pero si encaso esey no ta posibel, gobierno di AVP a haya encargo pa sigui cu plannan pa desaroya e area di San Nicolas den cua otro forma sano, cu ta crea trabou y entrada pa nos hendenan. E ponencia di e lider di PDR cu gobierno no a haya mandato pa expolora otro alternativanan cu e refeneria ta totalmente fo'i sla. Aparentemente e lider di PDR ta lesa solamente e mocionnan cu e mes ta entrega. E mester lesa e mocionnan cu fraccion di AVP ta entrega y aproba. Incluso esunnan cu e mes a sostene.

MANDATO
Gobierno no tin cu warda mandato di Parlamento pa e actua. AVP a saca economia di Aruba for di e abismo cu MEP a bay lague aden di -15% y pone bek riba caminda di crecemento den apenas cuatro aña. No a haci esaki cu mandato di Parlamento, pero  cu mandato di Pueblo y cu propio iniciativa. Gobierno di AVP a salba pensioennan di Aruba y sigura mas cu 20 mil famia nan pensioen pa awor y den futuro. No a haci esaki riba mandato di Parlamento pero cu mandato di Pueblo. Den caso di e refeneria, gobierno a haci tur lo posibel pa habri'e na 2011 y despues cu ela sera na 2012, gobierno y fraccion di AVP no a stop niun rato pa busca forma pa bolbe habri'e. Pero mientras cu tabata busca forma pa habri e refeneria via tur canal y den tur forma den tur pais den region, a sigui desaroya plannan pa e area di San Nicolas en caso cu e refeneria no por wordo habri mas. Pa haci esey gobierno no a busca mandato di Parlamento. E no tabata tin mester didje tampoco. Gobierno y fraccion di AVP no a sinta warda pa un mandato tampoco. E impresion cu gobierno no tin mandato pa busca otro desaroyo pa San Nicolas ta muestra di un asercamento misquino. Pasobra e meta principal ta cu mester desaroyo San Nicolas, crea cupo di trabou y entrada pa nos hendenan. Pa AVP, mester sigui desaroya henter Aruba, cu of sin e refeneria! Esey nos a pone den e mocion di AVP. Si no por habri e refeneria anto mester sigui desaroya e bunita aa di Sero Colorado. Pasobra ta e interes di San Nicolas y Aruba ta loke ta importante. E pensamento cu no por pensa riba nada otro forma pa desaroya San Nicolas, ta un asercamento limitativo cu sigur nos di AVP no ta comparti.    

Expresionnan haci den e articulo aki no necesariamente ta refleha opinion di ArenaPoliti.co