Diahuebs 27 di Augustus 2015 ta bai ta un dia historico  pa pais ARUBA unda e gobierno aki di AVP lo bai  entrega un parti grandi di nos autonomia nos STATUS APARTE back na Hulanda. Diahuebs  ta bay trata e ley di CAFT den Parlamento. Pa por logra un presupuesto balansa manera e acuerdo di CAFT ta prescribi, lo mester tuma medidanan. Medidanan lo tin consecuencia pa e poder di compra y e nivel di bida di e pueblo. E ora ta surgi e pregunta ‘dicon na ningun momento gobierno ta duna pueblo informacion kico e consecuencia di e medidanan pa nan cartera ta?

Tampoco gobierno ta duna informacion den ki areanan specifico lo bay tuma medida. Esaki lo crea claridad kico e medidanan lo nifica pa nan poder di compra y con e lo afecta nan nivel di bida. Den un democracia bibo esaki ta un procedura corecto pa sigi? Pasobra un deber di gobierno ta pa informa su pueblo den un forma corecto. Ta conoci cu un gran parti di trahadonan na Aruba ta gana salario minimo of menos ora nan ta traha illegal. Den caso di hendenan cu ta ricibi onderstand, ta conoci cu e suma aki no ta jega pa un nivel di bida digno. Esaki ta conta tambe pa penshonadonan cu ta biba di solamente penshon di SVB.

Den un democracia bibo y cu respet pa e pueblo gobierno at least mester a laga e instancianan concerni y cualifica hasi un calculacion kico e medidanan lo nifica pa e diferente gruponan di entrada. Aki nos por pensa riba p.e. Algemene Rekenkamer, Banco Central y Conseho Sociaal Economische Raad (S.E.R.). Tambe ta remarcabel cu gobierno no a consulta e gremionan manera sindicatonan y e fundacionnan cu ta duna judansa social y material na hendenan di menos recurso.

Por ultimo, loke cu ta riparabel tambe ta cu gobierno no ta bin cu un solucion y splica e pueblo con e ta bai page e gastonan astronomico hasi aki bek. Pueblo di Aruba merese di hanja su placa bek den caha y tambe sikiera un splicashon con nan tin pensa di logre.

Ora cu democracia tin respet pa pueblo, nan ta duna bon informacion y ta defende nan interes pa tin un nivel di bida digno, aunke e ta minimo.

Como ciudadano conciente mi tin e responsabilidad pa hasi pregunta ora mi ta haya cu pueblo no ta haya informacion riba cual nan tin derecho.


Alonso Tromp di PDR

Expresionnan haci den e articulo aki no necesariamente ta refleha opinion di ArenaPoliti.co