Pa duna un inspiracion na tur hoben di Aruba, Prome Minister Eman a cuminsa aña pasa cu un proyecto pa trece hunto hobennan cu a destaca den diferente area. Hobennan cu talento pa loke nan ta haci y cu dedicacion a sa di destaca na Aruba of den exterior. E proyecto di Prome Minister tabata pa crea un “Award Book” caminda ta reconoce y ilustra e asina yama ‘Role Models’ aki pa nan por inspira tur otro hoben di nos pais. Tur e role models aki a demostra cu kico bo pone bo curason den dje, bo por logra.

Den asociacion cu Playa Linda Resort y Aruba Bank, como socionan principal y tambe cu ayudo di Swingmasters, Evention’s Aruba y Click Print, Gobierno di Aruba a laga traha e aña aki un “Award Book” cu ta keda presenta diabierna awor 7 di november. Esaki ta durante un recepcion masha bunita ofreci na famia y amigo di e hobennan, mey mey di un publico grandi, danki na e cooperacion di Paseo Herencia Mall.  

Ministerio di Asunto General, Ciencia, Innovacion y Desaroyo Sostenibel ta masha contento cu por a cera un acuerdo cu Playa Linda Resort, Aruba Bank, Paseo Herencia Swingmasters, Evention’s Aruba y Click Print pa crea e proyecto aki.  Cada un di e socionan aki mester ta orguyoso di e sosten y motivacion cu ta duna na nos hobennan.

Na e bunita anochi aki, cada un di e hobennan aki lo ricibi e buki titula ‘Award Book Hoben y Talentoso 2014’ for di man di Minister President Mike Eman. Un invitacion cordial ta bay na henter e comunidad di Aruba pa bin Paseo Herencia Mall diabierna awor 7 di november pa 7.30 unda Gabinete Mike Eman II ta reconoce y honra nos role models hubenil cu mas a destaca durante ultimo aña.

Expresionnan haci den e articulo aki no necesariamente ta refleha opinion di ArenaPoliti.co