Den varios articulonan durante e ultimo aña UPP a mustra con poco poco Gabinete Eman a bin ta hiba un maneho cu no unicamente a hiba nos den un abismo financiero catastrofal, sino tambe cu e forma di goberna aki, ya caba desde Gabinete Mike Eman I, a bay ta peligrando e Status Aparte di Aruba y e autonomia.

Nos a anuncia tambe den nos ultimo articulonan cu despues cu e ley di CAFT wordo trata, practicamente ta cuminsa un lucha nobo aki na Aruba, na unda cu nos mester bay bringa pa demostra no na Hulanda, sino na mundo henter, cu nos ta merecedor di e autonomia cu Betico Croes, den feliz memoria, a lucha p’e y regala nos.

Mirando con e discusion aki na Aruba, mescos tambe con henter e ley di CAFT, a wordo trata den parlamento, sin un tiki respet pa e procedura, sin cu a sikiera consulta cu Pueblo, UPP a anuncia di antemano, cu na final no ta keda nada otro pa acerca Nacionnan Uni, pa asina laga nan scucha e keho cu tin.

Nos sa cu no ta algo facil pa bay acusa un gobierno of gobiernonan na e organo mas halto di mundo, pero mirando con Gabinete Mike Eman y Gobierno Hulandes ta hunga cu otro y cada uno na su propio bienestar, ta permiti y percura pa torno na nos autonomia, UPP ta kere cu esaki ta bira necesario pa asina avisa tambe cu e periodo di lucha nobo ta cuminsa.

UPP ta consciente cu den henter e desaroyo aki, nos mes como votadornan tin hopi culpa, mescos tambe cu e politiconan di e ultimo 30 añanan, cu no ta capaz pa pasa leynan cu di un banda ta restringi e poder di ministernan, dus e politiconan nan mes, mescos tambe cu leynan pa mara e quota di debe nacional na un nivel responsabel di nos GDP, y tambe pa hinca den nos Constitucion cu nos deficit presupuestario no por surpasa 3% di deficit.

Den nos carta e.o. nos ta mustra riba e hecho, cu despues di hopi decadanan, cu Gobierno Hulandes a purba di na moda nechi recobra parti di su podernan, cu awor cu un Gobierno Arubiano complaciente, varios aspectonan di loke hustamente e Declaracionnan di Nacionnan Uni ta para pe, esta riba e derecho igual di un desaroyo y emancipacion cultural, economico, y politico, Gobierno di Hulanda ta minando e derechonan aki. Derechonan cu ta mara tambe na derecho di auto-determinacion di nos pueblo y e derecho di por goberna su mes.

Di acuerdo cu capitulo 11 di Declaracion di Nacionnan Uni di aña 1945 y e Resolucion 1514 (XV) di aña 14 di december 1960, e Pueblo di Aruba tin e derecho pa wordo scucha na momento cu su autonomia ta wordo entrega, p.e. via di un referendum. Esaki ta hustamente loke no a sosode, sino mas bien ta pa medio di un protocol (2 di mei 2015) ta wordo cumbini cu ta bin un CAFT cu tur su derechonan y cu parlamento na su turno, pasando e ley, ta entrega su autoridad pa mishi cu e ley cu nan a pasa y tambe limita nan derecho di budget.

UPP a pidi Nacionnan Uni pa paga atencion pa e fenomeno di Neo-Colonialismo cu Gobierno Hulandes ta bin ta practicando ya caba desde 1993, purbando di influencia e maneho di nos gobiernonan. Poco poco nos por a mira con Hulanda poco poco a yega mas cerca pa logra su meta di eherce atrobe su poder absoluto riba e Islanan na unda nos por mira un metemento no solamente den nos autonomia financiero, pero tambe a percura pa Gabinete Eman doblega pa cambia su politica di admision pa Hulandesnan (mientras cu na Hulanda ta sera porta pa nos hendenan) y tambe aparentemente tin hopi cos di bisa den nos desaroyo economico, manera e exploracion di gas/petroli (participacion di Hulanda via Shell cu ta den Repsol y mescos tambe Gasunie BV). Nos por mira tambe henter un scenario cu Mike Eman a bin cu ne pa asina haci e influencia Hulandes mas grandi riba nos isla, dor di duna espacio na institutonan Hulandes, financia pa gobierno di Aruba, establece nan mes. Esey tambe nos a mira con den e posibel reapertura di nos refineria, Mike Eman ta bin cu e scenario di un partner Hulandes (Gasunie BV atrobe), pa e inversionista cu kier habri esaki bek.

Pa loke ta CAFT nos por mira con den protocol, tambe ta pidi pa regla cu no unicamente esnan cu ta bin pa haci e trabou di supervision lo por traha na Aruba (loke ta logico), pero tambe nan ta pidi “opschorting” di e reglanan pa partner di e Hulandesnan aki tambe por traha, sin tin nodi di cumpli cu permisologia cu otronan sí tin di tene cuenta cu ne.

UPP ta pidi pues na Nacionnan Uni, cu di acuerdo cu e resolucionnan y articulonan di e Declaracion di Nacionnan Uni al respecto pa manda un mision Aruba y asina haci un investigacion di e situacion real na Aruba, pa asina determina cu si e perdida di autonomia aki, si Hulanda den e caso aki no ta obliga, mescos den añanan despues di guera, tin di bolbe raporta na e comision di decolonisacion di Nacionnan Uni.


Den nomber di Union Patriotico Progresista – U.P.P.
Candelario A. S. D. Wever
Brazil, september 7, 2015

Expresionnan haci den e articulo aki no necesariamente ta refleha opinion di ArenaPoliti.co