No tin palabra pa describi locual a sosode dialuna ultimo, caminda un fraccion den Parlamento, esta fraccion di AVP sin ningun tiki di berguensa y gevoel a vota na fabor pa sra. Marisol Lopez-Tromp wordo reeligi como Presidente di Parlamento y sr. Chris Dammers como Vice Presidente di Parlamento. Un fraccion di AVP cu ta consisti di parlamentarionan traidor cu te ainda no sa kico ta significa honor y dignidad di un pueblo.

Presidente di Parlamento
Den e caso di Presidente di Parlamento, sra. Lopez-Tromp, ta increibel con e persona aki apenas 4 luna pasa, esta na mei 2015 a vota contra e presupuesto 2015 di pais Aruba y cu na final di votacion a wordo insulta den forma denigrante y cu palabranan ofensivo di parti di su propio lider di fraccion, Baba Herde. Hecho ta cu e votacion contra e presupuesto 2015 a trece hopi panico den seno di fraccion di AVP, pero tambe hopi rabia y perdemento di confiansa den e Presidente di Parlamento aki. Pero kico nos tur por a mira dialuna ultimo? Tabata hustamente e propio fraccion di AVP encabeza pa e mesun Herde aki a ser instrui y ordena pa doñonan di partido cu cueste loke cueste nan mester vota pa Marisol Lopez-Tromp bira Presidente di Parlamento. Esaki no ta nada straño den seno di AVP, ya cu e sinberguenseria aki ta forma parti di un deal cu mester a ser ehecuta, ya cu un condicion clave pa Marisol bira Presidente di Parlamento ta cu e mester vota na fabor di e ley di traicion di CAFT riba 27 di augustus ultimo. Y Marisol hunto cu tur e 12 otro parlamentarionan traidor a vota na fabor di e ley aki.  Asina un y tur por mira con e traicion di alto nivel aki contra nos autonomia financiero y Status Aparte di parti di Marisol Lopez-Tromp a ser recompensa cu e bunita puesto di Presidente di  Parlamento, ya cu ta conoci caba cu den seno di AVP, un man ta laba otro. Pregunta ta, unda honor y dignidad di e Arubiano orguyoso a keda aki?

Vice Presidente di Parlamento
Tambe e fraccion di AVP a sigui perde tur clase di berguensa y gevoel na momento cu nan a vota pa sr. Chris Dammers bira Vice Presidente di Parlamento. Hustamente esaki tabata e parlamentario y Vice Presidente di Parlamento, kende apenas un luna atras den oranan di marduga tabata conduci e auto di Parlamento y a kibra esaki den Savaneta. Te ainda ta un gran misterio kico a sosode riba e anochi aki, ya cu contra tur regla sr. Dammers ‘als een dief in de nacht’ a bandona e sitio sin a notifica polis di e accidente aki. Tur hende ta puntra nan mes ainda, dicon takelwagen si a wordo yama di biaha pa hiba e auto tur kibra na cas di sr. Dammers?. Pregunta y mas pregunta, sin ningun contesta contundente! Sinembargo e mal ehempel aki duna di parti di sr. Dammers a ser recompensa dialuna ultimo cu e bunita puesto di Vice Presidente di Parlamento. Un señal clave cu e institucion di Parlamento a conoce un degeneracion hamas bisto den historia di Aruba.
Asina pues nos por mira cu den AVP tur e politiconan riba lista tin un prijs, un mas halto cu otro, pero tur ta pertenece na e ‘one happy family and friends’ cu tin henter nos pais malogra y den ruina total.

Expresionnan haci den e articulo aki no necesariamente ta refleha opinion di ArenaPoliti.co