Prome Minister Mike Eman y Ministerio Mike de Meza na Waf Nobo di Barcadera 

ORANJESTAD – Waf di Barcadera ta den un fase sumamente interesante di desaroyo. Aunke e fecha di entrega di e proyecto ta final di februari 2016, na e momentonan aki mayoria di e trabounan ta pasando simultaneamente y por contempla e magnitud di e proyecto den su totalidad. Ta trahando riba area caminda cu containernan ta bay wordo staciona, edificio di oficinanan di ASTEC y tambe e trabounan riba e gantry.

Prome Minister Eman y Minister de Meza, for di oranan tempran di mainta a wordo ricibi pa director di ASTEC Mike de l'Isle cu a duna e recorido di waf nobo di container na Barcadera. Hunto cu nan tabata tin srs. Peter van Boeijen (Arcadis), Anko Koopmans (ASTEC), Johnny Martes (APA) y Randy Angela (ASTEC).

Director de l'Isle a splica cu e trabounan ta on-schedule y nan ta premira cu fecha di entrega ta na final di februari otro aña. Tanto e trabounan riba area caminda cu ta staciona e containernan como riba e gantry ta den fasenan hopi avansa y ta keda cla den e lunanan nos dilanti.

Un encuentro interesante cu e ministernan tabata tin ta esun cu e supervisor di e compania cu a traha e gantry, Paceco España, cu a duna un splicacion detaya di nan trabounan. Segun Francisco Velasco Garcia, nan a cuminsa 2 luna atras cu arma e grua cu a yega desmantela for di Spaña. Na e momentonan aki e gantry ta practicamente cla y ta bay dura 2 luna mas pa e por wordo transporta pa su posicion permanente, un poco mas cerca di caminda e barconan ta mara. E gantry, hunto cu e grua mobil, ta bay ta encarga cu e transporte di e carganan na Barcadera.

Na e momentonan aki tin 3 contratista cu ta completando diferente trabounan riba e tereno na Barcadera. Entre nan in ALBO, Arubaanse Wegenbouw y Croon cu ta ocupa cu e ultimo desaroyonan riba e waf.

Prome Minister a cataloga e proyecto aki como “un oportunidad hopi grandi pa Aruba.” E ta referi na e hecho cu tin varios posibilidad di desaroyo den e area pa Aruba cu ta bay contribui na diversificacion y mehoracion di e base economico di Aruba. “Ta cada bes di 30, 40 aña cu un pais ta haci un proyecto di infrastructura di e magnitud aki.”

Expresionnan haci den e articulo aki no necesariamente ta refleha opinion di ArenaPoliti.co