Gabinete ME II: Ministernan Eman y de Meza inspeccionando trabounan na waf nobo di Barcadera
ORANJESTAD – Piezanan di e grua nobo pa e waf di carga na Barcadera a yega, a wordo baha di barco y e trabounan pa arma y instala ya ta andando. E stap grandi aki den e proyecto ta yena Prome Minister Mike Eman cu hopi satisfaccion. Construccion di waf nobo di carga ta un di e cuater proyectonan grandi cu Gabinete Mike Eman ta ehecutando pa percura pa e progreso economico di nos isla den futuro.
Hefe di Gobierno di Aruba a haci un recorido compaña pa Minister di Asuntonan Economico Mike de Meza cu guia di Anko Koopmans, Development Manager di ASTEC. Koopmans a splica e mandatarionan tocante yegada di e Paceco Gantry Crane for di Bilbao, Spaña. Ta trata di piezanan pre fabrica cu ta forma un grua di 50 ton y cu ta bay tuma e siguiente cuater lunanan pa arma. E ta casi mesun grandi cu esun cu tabatin na waf di Oranjestad, pero hopi mas nobo y moderno den su sistema di operacion.
Adicional na e grua, Minister President Eman a combersa riba e impacto cu ya for di awo e waf nobo di carga ta generando y ta duna un perspectiva hopi positivo pa su operacion y aporte na economia di nos isla. “Tin empresa caba rond di desaroyo di waf cu kier traha riba e boeinan grandi cu ta wordo uza pa pone espacio entre barconan grandi cu nan kier bin desaroya y pone nan riba e tereno grandi aki; jachthaven cu ta busca containerhaven pa por lanta yatenan grandi for di lama, kier men un cantidad di actividad adicional cu ta bin cu e containerhaven nobo aki.”
Premier Eman no tin duda cu e decision di su Gobierno pa finalmente tuma accion riba plannan cu a pasa di un Gabinete pa otro durante 30 aña, ta bay duna y excede den su frutonan. “Waf di Barcadera ta trece mas actividad economico, ta trece un desaroyo social di mas oportunidad pa empleo,” el a comenta.
Tambe a añadi nan gradicimento y admiracion pa e compania y expertonan local cu ta dirigiendo tur e esfuerzonan aki. “Nos ta hopi orguyoso di e empresanan local ASTEC y Wegenbouw, APA cu a haci su parti dor di drecha henter e waf y e proyectonan aki ta esencial pa crea empleo y duna Aruba un infrastructura cu ta pone e isla distingui su mes for di otro pais y isla den Caribe.”
Una bes cu waf nobo di carga ta cla hunto cu expansion di Hospital, Green Corridor entre Oranjestad y San Nicolas y e ringweg, Aruba lo ta na un nivel hopi halto como pais y den un posicion sumamente competitivo pa diferente industria, compara cu otro paisnan den nos region.
Expresionnan haci den e articulo aki no necesariamente ta refleha opinion di ArenaPoliti.co