Gobiernonan a bin y gobiernonan a bay, pero nunca a concretisa proyectonan importante pa Aruba y su economia 

ORANJESTAD – Diaranson mainta Prome Minister Mike Eman hunto cu Minister Mike de Meza a haci un bishita di inspeccion na e trabounan di construccion di waf nobo na Barcadera. Nan kier a haya un actualisacion particularmente riba instalacion di e grua nobo, sin embargo, no por a evita di haci un recorido di henter e proyecto. Na final Minister President a reenfatisa e importancia pa su Gobierno asumi e responsabilidad den ehecuta proyectonan clave manera esaki, pero tambe di Hospital y vierbaansweg, entre otro.

Gabinete Mike Eman II ta ehecutando, for di prome dia, un vision total pa eleva nivel di pais Aruba. Esaki ta un plan cu a studia y delinea, ya caba for di oposicion. Den dje e elemento di infrastructura ta hunga un papel clave. “Hopi biaha bo ta tende discusion di cuanto esaki ta costa y cuanto aña tin cu bay paga, pero un pais cu no inverti den su infrastructura ta un pais cu ta keda atras,” asina Premier Eman a afirma.

E mandatario a splica cu cada bes cu un Arubiano bay biaha y bin bek impresiona di otro pais, ta paso el a mira un desaroyo grandi den e caretera, infrastructura, espacionan publico, parke y plazanan bunita of e ta gosa di transporte publico cu trein y tram. Esaki ta un pais cu ta haci un impresion riba inversionistanan cu ta ofrece su ciudadanonan e miho servicionan cu por tin. “E ta un pais cu ta inverti den su infrastructura y ta atrae inversionnan nobo,” segun Prome Minister Mike Eman.

Diahuebs tin riba programa otro bishita di inspeccion, e biaha aki na construccion di Hospital. Waf nobo y ampliacion di Hospital ta ehempel di algun di e proyectonan esencial pa hiba Aruba na un etapa nobo di progreso. “Proyectonan cu pa añanan tabata warda pa wordo ehecuta. Gobierno a bin y gobierno a bay y ta bisa cu ‘un dia nos mester di un container haven nobo pa duna nos area di crucero tambe oportunidad pa desaroya, pero nunca esaki a bin; un dia mester bin un vierbaansweg entre Oranjestad y San Nicolas, pero nunca esaki a bin,” asina Premier Eman a splica.

Gobierno di Aruba no ta perde otro aspectonan di bienestar for di bisa. Prome Minister Mike Eman a trece esaki dilanti indicando cu “Natural nos tin hopi pa haci ainda. Ainda tin desempleo, ainda tin pobreza, pa loke ta educacion tin hopi trabou pa haci ainda y tur e cosnan aki ta forma poco poco e puzzel di e pais cu nos ta idealisa, un pais economicamente fuerte cu un turismo creciendo pero tambe cu miho calidad di bida pa nos conciudadanonan.”

Criticonan di e vision y maneho di Gabinete Mike Eman ta manipula informacion pa trece un imagen bruha di loke ta realidad. Na opinion di Prome Minister, esnan cu ta bisa cu esaki no ta e momento adecua pa inverti, “ta personanan cu no ta mira cu hustamente e situacion ta haci cu ta importante pa keda inverti pa por hiba bo pais dilanti. Na e momento cu bo paralisa bo pais, manera nos a haye na 2009, bo ta haya deterioro y desempleo; bo ta haya falta di perspectiva y situacionnan caminda bo pais no ta competitivo mas.”

Waf di carga nobo na Barcadera ta un proyecto cu ta riba schedule y lo finalisa na januari 2015. Esey ta habri caminda pa desaroyo di waf na Oranjestad como un waf crucero den tur sentido di palabra y su conexion cu centro di ciudad renoba.

Expresionnan haci den e articulo aki no necesariamente ta refleha opinion di ArenaPoliti.co