POS CHIKITO -- Parlamentarionan di MEP a acudi na Pos Chikito y Savaneta pa scucha preocupacionnan di habitantenan pa cu construccion di e Green Corridor.
Ta asina cu e habitantenan mes no a haya ningun informacion kiko ta bai tuma lugar, te cu poco dia ey cu un persona di e compania CIC a pasa y avisa e habitantenan cu nan cas por sufri danjo door di e trabounan di construccion di e Green Corridor.
Esey a cai den masha mal tera serca e habitantenan, peor nan no a keha.

Awor ta resulta cu e caminda nobo ta pasa masha serca di nan cas, y nan no por saca nan auto pafor mas di nan cas. Esey si ta dimas, y nan a cuminsa cana un caminda di cruz pa haya atencion. Pero ningun caminda kier atende nan preocupacionnan y pesey a pidi atencion di Parlamentarionan di MEP cu semper ta acudi ora nan wordo yama.

Lider di MEP Evelyn Wever-Croes, hunto cu parlamentarionan Ady Thijsen, Chris Romero, Guillfred Besaril, y e politico hoben di Pos Chikito Gerick Croes a acudi na Pos Chikito den vecindario di botica Aloe, pa mira pa nan mes con peligroso e situacion ta bai bira.

Locual ta mas di condena ta cu ningun hende ta informa e habitantenan di nada. Algun tin miedo di bisa algo pa miedo pa represaya, pero otronan si a cansa y a vocifera nan preocupacion.

E Parlamentarionan a mira pa nan mes, y a tuma informacion pa nan bai cuestiona henter e asunto aki, pasobra no ta husto cu e habitantenan di Pos Chikito y Savaneta mester wordo sacrifica pa un capricho di gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co