MEP: Partido MEP ta anfitrion pa e Conferencia di COPPPAL e fin di siman aki na Aruba
E fin di siman aki lo ta uno sumamente importante pa partido MEP, ya cu lo bay tin dos actividad grandi cu ta trece tanto partido MEP como pais Aruba den un luz positivo, esta e Congreso pa eleccion di lider di MEP y e conferencia di COPPPAL (Conferencia Permanente de Partidos Politicos de America Latina y Caribe) y di cual partido MEP tambe ta miembro y co-fundador y cu Libertador Betico Croes como co-firmante di e organisacion aki. Alavez COPPPAL ta un organisacion cu tabata sumamente importante den e lucha di nos pais pa su autodeterminacion y su Status Aparte. E cantidad di partidonan politico cu ta miembro di COPPPAL ta 62 y for di 28 pais di America Latina y Caribe.
Agenda 26 september
Manera ta conoci caba e conferencia di COPPPAL lo tuma lugar e aña aki na Aruba. Pues partido MEP ta anfitrion di e conferencia aki, caminda varios delegado di varios pais di America Latina y Caribe lo cuminsa yega Aruba for di dia di 25 september 2015 caba. Riba e prome anochi lo tin oportunidad pa e delegadonan inscribi pa e conferencia aki y e inauguracion oficial mes lo ta su dia siguiente, esta dia 26 di September 2015. E temanan cu lo ser trata riba e prome dia di e conferencia ta Migracion, Status politico di e paisnan y islanan, Trato y Trafico di muhernan, Consecuencianan pa e hende muher debi na migracion masculino y paridad entre hende homber y hende muher den actividadnan politico. Ta bon pa menciona cu na October 2011 lider di MEP sra. Evelyn Wever-Croes ya a participa na un Seminario Mecanismo de Mujeres de COPPPAL na Argentina.
Agenda 27 september
Riba e di dos dia di conferencia di COPPPAL, esta dia 27 di September 2015 lo tin e conclusionnan, temanan general, lectura di documento final y clausura. Despues di esaki e delegadonan internacional lo ta presente tambe durante e Congreso di MEP den Cas di Cultura.
E conferencia di COPPPAL mes lo tuma lugar na Holiday Inn Hotel y ta exclusivamente pa e delegadonan internacional y naturalmente pa e delegadonan di MEP kendenan tambe lo haci nan presentacionnan durante e conferencia. Partido MEP ta hopi bon prepara y siguramente durante e conferencia aki lo trece padilanti tambe e preocupacion di nos partido pa loke ta e minamento di nos autonomia durante e ultimo lunanan aki.
Partido MEP ta desea tur e delegadonan internacional un bon bini na Aruba y ta spera cu e conferencia di COPPPAL lo resulta sumamente exitoso.
Expresionnan haci den e articulo aki no necesariamente ta refleha opinion di ArenaPoliti.co