"Ya di basta tempo caba fraccion di MEP ta bin ta haciendo preguntanan critico y directo riba e maneho deficiente di husticia na Aruba. Atrobe nos a tuma nota di un racha di incidente cu arma di candela den area di high rise hotels, pero tambe den areanan residencial. Ta sumamente preocupante cu apesar di e ola di criminalidad, e ciudadano Minister di Husticia ta tuma un postura a la "tapa solo cu un dede", bisando cu criminalidad a baha na Aruba.
Nos a tuma nota cu recientemente tabatin un dialogo social riba siguridad. Durante e dialogo aki ciudadano Minister di Husticia a duna un presentacion riba e situacion di siguridad na Aruba na tanto e gremionan sindical como comercial. Nos fraccion a constata via e medionan di comunicacion cu hasta e gremionan a sali for di e reunion sin a wordo presenta cu plannan concreto di con e gobierno aki tin pensa di pone un paro na e ola di criminalidad cu ta asotando nos isla.
Nos fraccion ta lamenta e direccion cu nos Pais ta bayendo aden. Criminalidad y specialmente e falta di atencion pa cu prevencion ta obvio pa un y tur. Siman pasa, den dos caso separa, criminalnan a drenta den casnan di hende, maltrata nan y horta nan pertenencia. Den ambos caso tabata trata di hendenan di edad halto. Enbes di por lo menos percura pa tin suficiente personal di polis pa patruya riba nos isla, e mandatario ta bira bisa cu un arogancia incomprendibel cu ta un percepcion di insiguridad tin. "Señor minister, mi kier wak cu ki cara bo ta para dilanti e persona nan aki y bisa nan cu e atraco cu a ser cometi riba nan, nan experiencia amargo, ta un percepcion e tabata!” 
Durante tratamento di presupuesto 2014 nos fraccion a elabora extensamente riba e introduccion di un sistema di "Boton di Panico" (Panick Button) como metodo di prevencion pa yuda nos grandinan y esnan mas vulnerabel den nos comunidad. Hasta comerciantenan lo por conta e ora cu un sistema cu lo por duna nan un proteccion adicional na momento di deposita placa of na cas. Durante tratamento di presupuesto 2015 nos no a cansa di menciona cuanto falta e servicio di helicopter ta haci como instrumento na yuda combatí criminalidad.
E actitud di parti di e titular di husticia ta confirma locual cu fraccion di MEP ta bin ta bisando fo’i basta tempo caba, esta cu no tin un maneho coherente riba e tereno di husticia. Y mas ainda cu e minister no ta convivi en lo absoluto cu e Pueblo cu ta hañe confronta cu atraco riba atraco!", parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co