Gabinete Mike Eman II a habri e siman cu e anuncio cu Gobierno di Aruba a haci entrega oficial di e Presupuesto Supletorio di pais Aruba pa aña 2014 na Parlamento. Prome Minister Mike Eman mes a comunica esaki na media local durante e conferencia di prensa semanal di e gabinete. E mandatario a duna di conoce cu, a base di e posicion inicialmente diferente cu tin entre Hulanda y Aruba, a busca un forma pa dialoga cu otro y yega na un consenso pa e direccion pa bay. “Pa Aruba ta importante e calidad di bida y no ta ciega su mes pa cifra of maneho di austeridad, los di un obhetivo,” Premier Eman a indica, añadiendo cu “A yega na un presupuesto supletorio cu Reino Hulandes por carga.” Adicional na e Presupuesto Supletorio, Gabinete Mike Eman II a traha y presenta un ‘Meerjarenraming’ pa e periodo entre 2014 y 2018.

E Presupuesto Supletorio ta hinca den otro teniendo cuenta cu e ultimo fase di reformanan di pensioen. “Nos ta mira cu e ‘Financieringssaldo’, cu ta e deficit, na 2014 ta 9.3, pero en realidad ta 4.7% paso ta inclui un contribucion hopi grandi di Pais Aruba di 170 miyon Florin den e fondo di APFA pa duna 100% cobertura pa e fondo di pensioen di ambternaarnan,” Prome Minister a splica. Entradanan adicional specificamente destina pa AZV lo drenta na vigor 1 di december na luga di 1 di september, manera anticipa anteriormente.

Ta proyectando un crecemento di Pais Aruba pa e proximo aña cu ta bay entre 3% pa 3.7%. Esaki ta danki na e modificacionnan cu a haci den presupuesto actual como den futuro caminda un parti importante tambe ta e reduccion di gasto di Gobierno. Den cuadro di e acuerdo di ‘Balanced Budget’ ta implementa un maneho financiero cu lo reduci e deficit te na 0.5% na 2017. “Esaki ta un di e concesionnan cu a haci na den e dialogo cu Reino,” Minister President Mike Eman a bisa.

E mandatario tambe a menciona e reformanan fiscal cu ta atendiendo actualmente y ta basa riba modernisacion y simplificacion di e sistema pa yega na un cumplimento mas halto y enfasis riba impuestonan indirecto. Otro factor cu ta contribui na e meta di reduccion di deficit ta e recortenan cu aparato publico a haci dor di no renoba contractonan, e areglo di VUT y tambe e opcion cu ta dunando esnan cu no kier wordo ubica mas na un funcion publico, pa haci e traspaso pa sector priva, cual ultimo ta hayando interes grandi.

Prome Minister Mike Eman tambe a trece dilanti e punto cu Gobierno di Aruba ta trahando riba e proceso di e departamentonan cu ta desea pa bira un N.V. El a menciona con coleganan Minister Oduber ta bezig cu Directie Luchtvaart, Minister Schwengle ta bezig cu Landslaboratorium, Minister de Meza cu Postkantoor y su mes, den Asunto General, ta bezig cu Departamento di Informacion y Automatisacion. Por ultimo, Premier Eman a menciona cu ta trahando riba e creacion di e Aruba Investment Fund como reemplaso pa Fondo Desaroyo Aruba cu ta yegando na final di su existencia despues di 10 aña di inversion riba henter e mehoracion di producto Aruba.

Despues di entrega di Presupuesto Supletorio na Parlamento, ta keda na e entidad aki pa trat’e den reunion publico caminda cada Minister ta duna contesta na preguntanan di e Parlamentario, y despues di su aprobacion, ta pasa pa oficina di Gabinete di Gobernador di Aruba, pa esaki duna su firma y bira oficial.

Expresionnan haci den e articulo aki no necesariamente ta refleha opinion di ArenaPoliti.co