Diaranson ultimoden Staten di Aruba a tuma luga e di dos tanda pa loke ta trata e ley di fiscalidad. Varios di e cambionan den e ley aki tabata desicionnan cu a wordo tuma durante maneho di Minister de Meza como mandatario di finanzas, sin embargo una bes cu a drecha e basenan legal pa e cambionan aki cu ta trata particularmente ‘inkomstenbelasting’y ‘loon belasting’  e concepto di ley di impuesto a keda formalisa y su legalisacion a tuma luga cu e aprobacion di e mayoria den parlamento.

Den a cambionan aki cu a wordo trata ta papia di e ‘extra ouderaftrek’ di 3500 pa aña cu ta conta pa esunnan cu tin 60 aña bay ariba. Tambe e tarifa special reduci di 15% pa pakete di retiro (pa esunnan cu ta bin na remarke pa esaki) cual ta keda na vigor te cu 31 di December di e aña aki.

E mandatario a sigui splica cu tambe a establece legalmente e tarifa di ‘inkomstenbelasting’ di aña 2008, 2009, 2010 y 2011. Den e concepto di ley cu a wordo formalisa tambe a cambia e parti di ‘indexering’ ya cu den e sistema anticua di e ‘inkomstenbelasting’ esaki tabata un articulo imperativo cu gobierno tur aña tabata obliga pa adapta e tarifa a base di e cifranan di inflacion y awor esey a bira opcional pa cual Gobierno y Minister di Finanzas ta haya mas flexibilidad pa adapta e tarifanan na inflacion of deflacion.

Durante e reunion tabata tin algun discusion tocante e fihacion di e asina yama ‘belastingvrije voet’ di nos leynan di inkomstenbelasting caminda a clarifica cu nan no ta cay bou di indexering, pero si, Minister di Finanzas a indica cu, a yega na un acuerdo riba un di e protocolnan anterior, esta e ‘cap’ di e aña venidero riba e deduccion di interes riba e aangifte di ‘inkomstenbelasting’ ta te cu un suma di 50 mil.

Pa Minister Bermudez e cambionan aki sigur ta trece un grado di satisfaccion ya cu oficialmente nan ta keda ancra den nos leynan di impuesto. “Mi ta contento cu nos logra formalisa y legalisa e cambionan aki cu a wordo proponi den diferente protocol anteriormente y di mesun forma nos lo continua pa finalisa algun mas pa e aña aki manera e begundstigend beleid y zoning di San Nicolas entre otro”, e mandatario a indica.

Di e forma aki tambe lo tin tur loke a palabra den diferente dialogo social y den e cuadro di maneho di Gobierno anterior lo keda formalisa y asina pa 2015 habri cu e cambionan di ley necesario pa futuro y no pa sigui coregi algun cos di pasado.

Finalmente Minister Bermudez a indica cu lo no tin un introduccion di un belasting nobo pa prome di Januari 2015. Sin embargo e expectativa ta pa prome cu fin di aña e comision di profesor Vermeend entrega e recomendacion definitivo pa modernisacion y simplificacion nos leynan di impuesto.

E mandatario ta kere si cu den un tempo hopi mas lihe por cuminsa cu e proceso di modernisacion di e sistema y leynan di belasting na Aruba, por ehempel door di saca a afo cierto articulo nan cu no ta valido of na vigor mas pa motibo cu nan ta anticua y di e manera aki tambe bo ta crea un miho vehiculo legal pa loke ta trata e ehecucion di e departamento di impuesto y cumplimento cu e leynan aki tambe.

Expresionnan haci den e articulo aki no necesariamente ta refleha opinion di ArenaPoliti.co