Den su afan pa realisa su vision pa na 2020 Aruba ta independiente di energia fosil, Gabinetenan Mike Eman a bay en busca di partnernan y hunto cu nan ta haciendo lo maximo pa logra e bunita meta aki. Cu partnernan di exterior y di aki mes a cuminsa cana cu pasonan firme riba caminda cu yama Vision 2020. Esaki ta encera cu mester cana un caminda largo yena cu obstaculo. Pero obstaculo tey pa wordo surpasa y esey ta loke ta haciendo. Kita problema di caminda pa na final cumpli cu e agenda berde di Gabinetenan Mike Eman. Aruba tin biento y solo na adundancia y banda di esaki e isla ta rondona pa lama cu olanan grandi. Fuentenan natural cu ta wordo ofrece gratis na nos y mester pon man na obra pa usa nan di e forma mas efienciente y sostenibel posibel. Aruba tin caba un parke di Molina di biento na Vader Piet, un parke solar na aeropuerto cu ta un di e mas grandinan den region, e planta EcoGas di ‘waste to energy’. Mientrastanto tin hotel ta haciendo uzo caba di e olanan grandi di lama pa fria nan airconan. Banda di tur esaki tin proyectonan chikito y mediano andando riba nos isla. Hopi hende ta mas y mas consciente cu no por sigui haci uzo di petroleo fosil cu no ta bon pa nos medio ambiente y pa haci mas tanto uzo di loke naturalesa ta ofrece nos.

Un proyecto grandi cu a caba di incia ta instalacion di panelnan solar riba daknan di varios scol na Aruba y ocho edificio di gobierno. No ta tur dak ta adecuado pa e instalacionnan aki. E daknan di e scol y edificionan aki a keda aproba y mesora WEB NV a start cu e trabounan, esaki den cooperacion cu ELMAR NV y Gobierno. E prome scol cu ta hayando panelnan solar ta scol basico Kudawecha. Ya trabounan ta avansando, pero pa motibo cu no por traha den oranan regular door cu ta duna les, e trabounan ta tuma lugar den oranan di atardi y den weekend. Esaki ta haci cu e proyecto ta dura un poco mas cu a anticipa. Despues di scol Kudawecha ta sigui pa Filomena College MAVO na San Nicolas. Ora nan keda cla ta sigui cu e siguiente scolnan cu a bin na remarke. Diferente edificio di gobierno tambe ta bay haya panelnan solar. MFA Noord ta e prome edificio di gobierno cu su energia ta wordo 100% genera door di e panelnan solar. Cocolishi 60% y poco poco demas edificionan ta sigui. Banda di esaki tin hopi cas na Aruba cu tambe ta instalando panelnan solar riba nan daknan cu ta algo di aplaudi. Aruba ta e ehempel den mundo riba tereno di sostenibilidad. Vision 2020 ta canando e caminda berde, surpasando barera, kitando obstaculo di caminda y di e forma aki logrando e meta final di ta independiente di energia fosil na 2020.

Expresionnan haci den e articulo aki no necesariamente ta refleha opinion di ArenaPoliti.co