E estudio a keda publica den e revista academico di e universidad 

ORANJESTAD/WASHINGTON – Vision di Gobierno di Aruba y Prome Minister Mike Eman riba desaroyo sostenibel a keda publica den un articulo recien di Universidad Johns Hopkins. E articulo cu ta un “Case Study” riba e Legado di Premier Mike Eman ta yega na e conclusion cu Aruba ta ‘riba e caminda corecto pa loke ta su futuro’ y ta un ehempel balioso riba tereno di sostenibilidad pa otro paisnan.

Algun luna pasa Aruba a wordo aserca pa  un grupo di studiante di Universidad Johns Hopkins cu poco aña pasa a haci un case study di Prome Minister Eman. E tempo ey Carbon War Room a brinda nan cierto informacion. Universidad a tuma contacto cu e grupo aki pa pidi nan un update di nan estudio ya cu e intencion ta pa publica e resultado den revista di e Universidad. E studiantenan di Advanced International Studies (SAIS) recientemente a papia cu Prome Minister Eman riba su vision y e case study awor ta publica den e revista di e prestigioso Universidad Johns Hopkins.

‘The Journal of International Solutions for Energy and the Environment (iSEEE)’ di Universidad John Hopkins University, School of Advanced International Studies na Washington, D.C. a publica un articulo grandi den cual ta aplaudi e vision di gobierno y Prome Minister Mike Eman pa promove desaroyo sostenibel na Aruba. E articulo cu a keda publica dia 28 di September 2015 tin como titulo “Sustainable Development in Aruba: A Case Study of Mike Eman’s Legacy”.

E revista lider riba tereno di analysis y debate riba politica di exterior, economia y asuntonan global Foreign Policy a clasifica e ‘School of Advanced International Studies (SAIS)’ di Jonhs Hopkins University na di dos lugar pa su programa pa logra un masters degree den estudionan internacional. Georgetown University na Washington ta na di prome lugar sigui di biaha pa Johns Hopkins, prome cu  Harvard University. SAIS ta conoci  pa su programa cu ta practico y orienta riba solucion pa loke ta energia y medio ambiente. Pa Aruba wordo reconoci pa un Univeridad di e caliber aki ta algo di ta masha orguyoso mes di dje. Vision 2020 ta den wowo di mundo.

E pasonan innovativo y di pionero cu Aruba ta tumando pa loke ta desaroyo sostenibel ta sigui atrae reconocimento internacional manera cu e revista academico masha respeta aki ta indica den un publicacion profundo di e balor di e vision cu Prome Minister Eman tin pa Aruba. E publicacion ta elogia e rol di liderazgo di Aruba den region y su plannan ambicioso, pero na mes momento realistico di transicion pa energia renobabel y den tuma otro pasonan pa sigura cu tur ciudadano ta beneficia di e ‘prosperidad sostenibel’.  

Lesando e publicacion di e Case Study di cual e y su vision pa Aruba ta e tema, Prome Minister a bisa: “Nos ta orguyoso cu Aruba a haya reconocimento pa a bay en busca di un forma pa logra prosperidad sostenibel y prosperidad comparti. Ta duna nos animo di mira un publicacion den un revista academico importante cu ta wordo lesa rond mundo. Un publicacion cu a studia den forma cuidadoso nos vision y kico nos ta haciendo den e area aki.  Nos semper a kere cu loke nos ta haci ta bon pa Aruba, pero ta semper agradecido pa tende cu otronan di afo ta studia nos maneho y ta conclui cu Aruba ta riba e caminda corecto.”

Expresionnan haci den e articulo aki no necesariamente ta refleha opinion di ArenaPoliti.co