PAGA BELASTING TA DEBER DI NOS TUR, PERO NO PAGA DIMAS 

SANTA CRUZ -- Lider di MEP Evelyn Wever-Croes a duna di conose cu na Cede di MEP lo ta organisando un biaha mas e ayudo pa yena bo formulario di inkomstenbelasting pa 2014. Dia 1 di oktober tur hende mester a ricibi nan formulario di inkomstenbelasting pa 2014 y bo tin te 1 december 2014 pa entrege.

Cuminsando diaranson 21 di oktober na Cede di MEP Evelyn Wever-Croes, Gerick Croes y henter e team ta cla pa yuda un y tur cu acudi, desde 6or pa 8or di anochi.
E ayudo aki ta gratuitamente, manera Evelyn Wever-Croes a bin ta organisa ya pa 5 anja consecutivo.

Documento di salario y pension
Ta importante pa bo trese tur bo formularionan, esta comprobante di entrada y salario di bo donjo di trabou, caunto placa bo a gana den 2014. Si bo ta pensionado, bo mestewr haya un comprobante di SVB cuanto pensioen di biehes bo a ricibi na 2014.

Interes riba debe
Tene cuenta tambe cu gastonan cu bo por deduci, manera interes paga na banco den 2014 of na otro institucion financiero, manera Island Finance, pero tambe na mueblerianan of otro tiendanan cu bo ta cumpra riba credit.

Yiu ta studia den exterior
Den caso cu bo tin yiu ta studia den exterior, bo mester trese un comprobante cu e yiu ta inscribi na un universidad den exterior na 2014, y e gastonan cu abo mes a cubri pe.

Gasto di notario
Den caso cu bo a sera un hipoteca den anja 2014, of bo a refinancia bo hipoteca, bo por dedusi e gastonan di notario. Den e casonan aki bo mester trese copia di e recibo di notario. Si bo a cumpra un propiedad, e gastonan ey di notario no por wordo declara.

Seguro di bida
Gobierno a cambia e ley y actualmente no por dedusi tur prima di seguro di bida mas. Trese bo comprobante pa nos evalua.

Nos ta spera bo na Cede di MEP pa yudabo cu bo formulario. Si bo no por yega diaranson diasabra nos lo t'ey tambe di 9or mainta te 3 or atardi.

Paga belasting ta deber di nos tur, pero no paga dimas belasting si. Bin serca nos, pa nos yudabo yena e formulario bon, pa bo por entreg'e na tempo.

Expresionnan haci den e articulo aki no necesariamente ta refleha opinion di ArenaPoliti.co