For di su inicio, BBO a keda un topico di discusion. Oponentenan di BBO tabata reclama entre otro cu BBO lo baha e poder di compra, y cu su forma acumulativo no ta husto. BBO a hasta hunga un rol principal den e victoria electoral di AVP na aña 2009. Mientrastanto BBO a baha, pa despues wordo aumenta bou di otro nomber (Health Tax/BAZV).

Discusionnan fuerte a tuma luga den Parlamento entre fraccion AVP y partidonan den oposcion. Banda di e critica y diferencianan di opinion entre e partidonan, ta interesante pa sa kico e maneho di otro partido lo ta si nan bin na mando. ArenaPoliti.co a aserca lider di e partido mas grandi den oposicion pa haya sa kico MEP lo haci cu BBO y otro impuestonan indirecto si MEP bin na mando.

E pregunta exacto cu ArenaPoliti.co a haci na sra. Evelyn Wever-Croes ta: “Si MEP logra forma un gabinete pa goberna nos pais despues di e siguiente eleccion, kico lo ta e futuro di BBO, BAZV (Health tax), y e transaction tax (si Gabinete ME II implement'e)?”

Evelyn Wever-Croes: “Nos di MEP ta di opinion cu e pasonan encamina pa gobierno di MEP desde 2007 mester wordo continua. Esey tabata pa cambia e enfasis di belastingnan directo (por ehempel inkomstenbelasting) pa belastingnan indirecto (por ehempel BBO).”

Pues MEP keto bay ta para tras di e plannan di Gabinete Oduber 4 pa bay mas den direccion di impuestonan indirecto. Un direccion cu tur partido ta di acuerdo cune. E manera pa ehecuta e cambio di enfoke aki ta loke partidonan ta diferencia di opinion riba dje.

Bayendo mas specifico riba BBO, sra. Wever-Croes ta sigui elabora: “Nos ta kere tambe cu e BBO ta un bon forma pa gobierno‎ haya entrada na tempo y segun su 'fair share'. Pues nos ta kere den e tipo di belasting aki.”

Tocante ‘health tax’ y tambe e ‘transaction tax’ cu Gabinete Mike Eman II ta considerando pa implementa, sra. Wever-Croes ta contesta: “Nos no ta di acuerdo cu tur e otro belastingnan cu ta wordo introduci na forma "versnipperd". E ta haci e sistema di belasting mas intransparente y complica, innecesariamente.”


ArenaPoliti.co lo sigui busca contesta riba preguntanan cu tin den Pueblo. Pa sugeri un pregunta, manda un email pa This email address is being protected from spambots. You need JavaScript enabled to view it. of un message via nos Fb page www.facebook.com/ArenaPoliti.co

Expresionnan haci den e articulo aki no necesariamente ta refleha opinion di ArenaPoliti.co