Desde cu Gabinete Eman a hisa benta un aumento di 1% di health tax riba e bbo existente tin bruhacion con pa implementa esaki ora di por ehempel facturacion di e impuesto aki. E maneho di goberna pa loco ta resultando den frustracion creciente pa e cuidadano como consumidor pero tambe pa cierto comercientenan cu kier trata na hasi cosnan bon. Pesei e ta hopi importante pa pone enfasis riba un diferencia cardinal entre health tax y bbo. Den caso di health tax e ta un obligacion pa presenta e cobransa riba e factura ( pa bbo e no ta asina).

Pa trece clarificacion nos kier a duna un ehempel di e bbo ora cu esaki tawata 1.5%. Si un comerciante nunca a ilustra e bbo riba su factura esaki ta nifica cu e tawata den e prijs. Imagina bo a haya un factura di 1000 florin ora cu e comerciante declara su bbo na servicio di impuesto e ta paga 15 florin na bbo. Si dado caso e dicidi di pone riba su factura lo tin e siguiente scenario:

1000 + BBO 1.5% = 15 florin = 1015

Esaki ta nifica cu e suma di 1015 ta e omzet( entrada, turnover). Basicamente e ganashi ta mas hopi pasobra e suma adicional di bbo presenta riba e factura ta wordo considera como entrada. Den e caso aki e total di bbo cu e lo paga na servicio di impuesto ta 15,23. Awor den e caso simpel aki e diferencia ta 0.23 cent pero corda cu riba sumanan cuantioso e ta hasi un diferencia! Awor sea e comerciante a wordo malinforma of concientemente a opta pa tin un margen di ganashi extra. Esaki kizas lo ta e caso di e compania estatal cu a opta pa presenta tanto e bbo y health tax riba nan recibo. Loke tur persona mester corda si ta cu BBO no ta un salex tax sino un belasting riba entrada. Esaki kiermeen cu no ta e consumidor mester carge sino e comerciante! 

Tempo cu BBO a wordo introduci na 2007 no ta solamente e cuidadano a wordo acomoda cu algun cambio (por ehempel reduccion inkomstenbelasting) pero tambe e comerciante. Por ehempel a baha winstbelasting di 35% pa 28% cual ta un reduccion di 7%. Ademas di esaki a reduci tambe mayoria di e tarifanan di invoerrechten. Por ultimo den e formulario di winstbelasting a crea un rubrica (espacio) extra unda cu e comerciante por a deduci esaki como un gasto. Si awendia comercio na Aruba a haya e necesidad pa aumenta prijsnan atrobe ta nifica cu  nan costo di operacion lo a subi. E aumento di tarifa di coriente mes ta un ehempel cu ta pone tanto comerciante y e homber chikito paga mas pasobra e lo wordo recalcula den prijs door di e comerciante. 

E ta un hecho si cu gobierno a hisa benta un aumento di bbo sin tuma e debido preparacion cu lo por tawata por ehempel un campaña di informacion pa tanto e cuidadano y comerciante ta na altura di e cambio y su efectonan. Aunke no por a spera esaki di parti gabinete eman tampoco pasobra e la priminti cu e lo a elimina bbo y a bira aumenta esaki contradiciendo su mes. Bo por conclui cu pa via di e maneho di medida di Gabinete Eman e cuidadano ta paga mas! 

Expresionnan haci den e articulo aki no necesariamente ta refleha opinion di ArenaPoliti.co