"Sopi pura ta sali salo", esaki sigur ta un expresion cu ta cuadra cu e accion di Gabinete Eman ora cu 1 december 2014 e BBO awordo aumenta cu 1% di BAZV. E ehecucion di e impuesto aki a causa hopi frustracion den nos comunidad. Banda di esaki na e momento di implementacion hopi comerciante tawata bruha/malinforma con pa presenta esaki (si of no) riba nan factura. A resulta despues cu mayoria ta cobrando e impuesto na un forma incorecto y esaki ta netamente loke nos di oposicion a vocifera y trece padilanti. Tur dede tawata mustra cu ciudadanonan como consumidor a sali perhudica pasobra ta paga mas ora di wordo cobra BBO y BAZV.

Frustracion creciente
E maneho di goberna pa loco ta resultando den un frustracion creciente pa e ciudadano como consumidor pero tambe pa cierto comercientenan cu kier trata na haci cosnan bon. Apesar cu e ciudadano ta esun cu directamente a wordo perhudica no mester lubida cu comerciantenan cu kier haci lo corecto a cambia un ke otro den nan administracion y logicamente tawatin costonan di por ehempel programacion envolvi. Promer cu e ley di BAZV a bira vigente, e departamento encarga cu impuesto tawatin e tarea di informa e comerciante (como instruccion di Gabinete Eman) di antemano tocante e cambio y su efectonan.  Esaki departamento di impuesto a haci tambe pa medio di un comunicado data 28 november 2014 (2 dia prome cu e ley a drenta na vigor). Por mira riba e comunicado (mira foto #1) cu Departamento di Impuesto (kizas a base di ordo di Gobierno) a duna cierto instruccionnan. Remarcabel ta cu den e “info brief” Departamento di Impuesto a instrui tur comerciante di tal forma pa cobra y ilustra tanto e BBO como e BAZV riba e factura.

Comerciante tin cu paga
Despues cu pueblo na varios biaha a expresa su disgusto riba e diferente formanan con nan ta sigui wordo cobra inncorectamente, Departamento di Impuesto a bolbe yama un conferencia di prensa dia 22 januari 2015. Eynan Inspector di belasting a declara entre otro cu mayoria comerciante lo ta cobrando BAZV incorectamente. Adicionalmente e la declara tambe cu no ta e comunidad tin cu paga e BAZV sino e comerciante. Mas aleu e inspector a bisa cu e comerciante mester mustra un solo prijs riba e recibo. Durante e conferencia e Inspector di belasting a presenta 2 scenario  (foto#2 y #3). Foto #2 tawata mustra un factura unda cu e BBO y BAZV tawata ilustra riba e recibo. Banda di esaki a presenta un di dos scenario (foto #3) unda cu e BBO y BAZV no ta wordo presenta riba e factura. E inspector a expresa cu e ultimo (foto3#) ta e manera corecto.

Campaña di informacion
Ironico ta e hecho cu desde cu Gabinete Eman MES a instrui e comerciante for di 28 november 2014 con pa cobra e impuesto(cobra riba recibo), casi 2 luna despues riba dia 22 januari 2015 ta sali declara cu esey ta incorecto! Den henter e dilema aki e protagonistanan cu ta gobierno y Departamento di Impuesto a comete un blunder contra e ciudadano. E ta di lamenta cu despues cu nos di oposicion a vocifera cu un preparacion debido mester tuma lugar, por ehempel un campaña di informacion pa tanto e ciudadano como e comerciante ta na altura di e cambio y su efectonan, toch Gabinete Eman a hisa benta un aumento di BBO cu tanto e mes a critica! Awendia full e implementacion y ehecucion a resulta un blunder completo afectando e consumidor y  creando frustracion tambe pa e comerciantenan. Loke si ta di remarca contrario na e comerciante ta e hecho cu un cuidadano no tin un rubrica den su aangifte cu posibilidad pa deduci "bbo" for di su entrada manera ta e caso cu e comerciante por hasie for di su resultado. Un cos ta sigur cu pa via di e maneho di medida di Gabinete Eman e ciudadano ta paga mas!

Expresionnan haci den e articulo aki no necesariamente ta refleha opinion di ArenaPoliti.co