Alguna siman atras tawatin un reunion relaciona cu e reforma fiscal cu lo drenta na vigor dentro di poco. Lider di fraccion di AVP no a perde pa gana y a saca un comunicado declarando cu e reforma fiscal lo mester tin beneficio pa tanto comercio y comunidad. Den principio e expressionan aki ta poco hipocrita mirando cu reforma na caminda ta forma parti di e 24 medidanan na caminda ta pa sanea e desaster financiero cu AVP a crea pa nos pais
den termino mediano. Den mesun rosea e la señala cu BBO lo tawatin beneficio pa gobierno so y no pa comercio tampoco cuidadano. Obviamente e parlamentario nunca a lesa e leynan corespondiente completo y pesei a hasi ponencianan totalmente robes. Relaciona cu esaki den e comunicado aki nos cu argumentonan valido lo desbarata ponencianan di sr. Herde y mustra pueblo cu unico cos cu e ta hasiendo ta defendiendo un reforma fiscal cu den principio lo bai bini door di mal maneho financiero.

Su ponencia cu pueblo y comercio no a haya niun beneficio cu BBO ta uno incorecto. Nos ta lamenta cu awendia tin parlamentarionan cu ta mas bien competi pa e titulo maximo di manipulador y cu a sobra poco representante sincero cu por informa pueblo manera debe ser. Na promer lugar mester enfatisa riba e hecho cu BBO a wordo introduci na 2007 pa cambia e sistema di belasting di directo pa indirecto. Den cuadro di e introduccion a dicidi pa compensa
tanto e cuidadano y comerciante cu incentivonan. Pa e cuidadano a 1) Rebaha belasting riba entrada (“inkomstenbelasting/loonbelasting”, 2) Rebaha invoerrechten riba cierto productonan, 3) implementacion di otro beneficionan fiscal pa e cuidadano. Logicamente e intencion semper tawata pa continua na baha e loonbelasting pa asina e cuidadano por tin mas placa netto den man tur luna, y laga e mes dicidi kiko lo cumpra y ki ora e ta paga BBO. Pa loke ta trata beneficionan fiscal esakinan tawata entre otro aumento di e suma cu por deduci como verwervingskosten,
aumento di e suma cu por deduci pa spaar- en voorzieningsfonds, aumento di e suma cu por deduci como prima di seguro di bida, eliminacion di belasting ariba interes di placa gespaar. E parti di reduci invoerrechten su meta principal tawata pa hasi prijs di productonan mas accesibel pa supermercadonan por a mantene prijs popular. Awendia mayoria invoerrechten a wordo aumenta. Pa colmo for di e propio palabranan di prome minister bo por compronde cu lo bai tin mas aumento di impuesto na frontera( aunento invoerrechten).

Pa banda di comercio a baha e tarifa di winstbelasting di 35% pa 28%. E reduccion di invoerrechten automaticamente tambe tawata aplicabel pa comercio pa por tawata mas competitivo den comunidad. Hopi importante tawata e hecho cu e BBO paga por a wordo deduci tambe. Pa clarifica esaki den e formulario di winstbelasting departamento di impuesto a crea un rubrica (espacio) extra unda cu e comerciante por a deduci esaki como un gasto (for di su resultado).

Pueblo por conclui a base di e informacion aki cu e ponencianan di Sr. Herde ta incorecto y por wordo desbarata pasobra ta full un comunidad a haya compensacion. Hecho si ta cu AVP a hasi un politica barata hungando cu sentimento di pueblo pa elimina BBO (cual te dia di awe no a cumpli cune tampoco). Ironico ta e hecho cu AVP semper tawata critica impuestonan nobo siendo cu dentro di poco un cantidad lo bai wordo implementa riba lomba di pueblo.

Sigur un di e erornan mas grandi di AVP tawata corta un entrada substancial pa pais Aruba y awor e consecuencianan ta bisto. Reforma fiscal probablemente lo a bini un dia pero no na e forma y tempo cu e ta tumando lugar pasobra esaki ta meramente a consecuencia di mal maneho financiero. Pa finalisa pueblo mester ta conciente cu si gabinete Eman lo tawata responsabel pais Aruba nunca mester a pasa den un cataclismo cu tanto medidanan afectando cartera di cada cuidadano na Aruba y cosnan lo por tawata diferente.

Expresionnan haci den e articulo aki no necesariamente ta refleha opinion di ArenaPoliti.co