Den preparacion di tratamento di presupuesto di gobierno pa 2015 den Parlamento, fraccion di AVP ta analisando e presupuesto, mientras cu ta busca informacion y conseho adicional pa por fiha un punto di bista riba tur aspecto di e presupuesto. Un di e puntonan cu a señala caba ta cu e presupuesto ta depende hopi di e entradanan di belasting existente y di cobransa di belasting atrasa. E fraccion di AVP ta sostene e maneho pa no introduci mas belasting, pero pa cobra miho loke tin riba caya y cu ya tur hende mester a paga. E fraccion ta sostene e idea pa baha e peso di belasting directo y pa busca mas entrada den belasting indirecto manera e proposicion pa reforma di e sistema di belasting ta ensera. Pero e introduccion di esaki ta tuma mucho tempo segun e fraccion. E fraccion di AVP ta haya cu e presupuesto 2015 mester a indica unda mas ta haya entrada den 2015 y duna mas claridad na comercio y comunidad riba e total di maneho fiscal.

MANEHO SOCIO-ECONOMICO
E fraccion di AVP ta sostene completamente e reforma di operasion di aparato di gobierno, di entrada y gastonan di gobierno, di e sistema di belasting y cu e reforma di tur esaki mester bay gradual y balansa. E fraccion ta sostene e maneho pa e reforma no mester stroba e desaroyo economico, e creasion di cuponan di trabou, e desaroyo di e pilar economico nobo y e stabilidad social cu a logra crea desde 2009. Mientras cu e fraccion ta haya cu esaki ta e maneho corecto pa sigui saca Aruba padilanti, e fraccion ta haya cu mester haci mas a corto plazo pa logra esaki. Riba esaki e lider di e fraccion di AVP a bisa lo siguiente:"Obviamente nos no ta cla cu e analysis di e presupuesto. E prome "scan" cu nos a haci ta mustra cu e presupuesto ta keda den e cuadro financiero cu a fiha dos aña pasa y un aña pasa. E presupuesto ta cumpli cu e metanan financiero pa 2015 cu a fiha den e presupuesto di mas aña. E presupuesto no ta contene medidanan manera oposicion a bisa cu lo bin. Pero falta iniciativanan den diferente ministerio riba entradanan cu normal lo mester a haya y cu tur hende mester cumpli cun'e. E presupuesto falta iniciativanan concreto pa reduci costo di operasion di e aparato di gobierno cu awor aki ta cumbri e parti mas grandi di e presupuesto nacional di henter nos pais. E presupuesto falta iniciativanan pa logra e metanan economico, social y financiero cu nos fraccion ta sostene. Falta mas iniciativa pa haci inversionnan necesario. Den e dia y simannan cu ta bin nos mester haya mas claridad di tanto gabinete como di otro instancianan relevante, pa nos por yega na un bon comprondemento di e presupuesto y di e maneho su tras, prome cu nos trat'e den Parlamento. Cu otro palabra: bon maneho, pero accionnan falta."

Expresionnan haci den e articulo aki no necesariamente ta refleha opinion di ArenaPoliti.co