Unbes escogi y huramenta como representante di pueblo bo mester ta conciente cubo tin un rol hopi importante den nos comunidad y sigur pa nos hobennan. Hopi biaha bo ta haya e impreshon cu politiconan ta lubida cu nan ta wordo mira y cu pueblo ta spera nan comporta nan mes manera tal. Parlamento di Aruba ta e organo mas halto den constitucion di nos pais y den principio mester lead by example. Ora nos ta papia cubo mester ta un ehempel pa comunidad kiermeen cu cada parlamentario individualmente mester tin un bon reputacion demostrando esaki den sala di parlamento pero tambe pafor.

Obviamente loke nos tur kier ta un parlamento di NIVEL y uno respeta! Pero esakinan bo ta gana demostrando cu bo accionan. Tur parlamentario mester mustra cu nan ta respeta nan reglanan y cumpli cu reglamento di ordo manera ta stipula. Si bo faya pa sigui reglamento di ordo ta prueba caba cubo no tin disciplina y cu pueblo no ta interesabo. Parlamentarionan mester ta conciente cu pueblo ta paga salario y como tal ta ser spera un politica di nivel halto cual cumpli cu reglanan ta halto riba e lista di exigencianan.

Algo cu bo ta nota durante reunionan di parlamento ta cu parlamentarionan hopi biaha no ta ALCASO den e debatenan. Cu esaki mi ta referi na desvia di e tema cu na e momentonan ey parlamento ta tratando. Actualmente tanto parlamentarionan y ministernan durante un reunion ta tuma hopi tempo pa papia pero ta dedica esakinan pa meramente kita credito di gobiernonan di 8 of 12 aña pasa. Siendo cu e ta obvio cu nan ta gobernando awor y nan por tuma decisionan awor pero ta opta pa culpa gobierno di pasado pa nan eror, negligencianan of incapacidad actual. Pero desviacionan ta tuma lugar cada biaha na diferente forma entre otro door di tiramento di palabra, manda sunchi, grita enz. Faltando respet no solamente pa nan coleganan y e organo riba su mes. Loke nan mester realisa ta cu esnan cu ta wak y sigui reunionan lo bai husga a base di e actonan aki.

Ultimo reunionan tin un fenomeno di bully tambe den parlamento y parlamentarionan masculino cu ta falta respet pa esnan femenino. Dunamento di nomber na otro pa e estado fisico di un persona ta algo di condena den tur sentido y ta di lamenta cu esaki ta sosodiendo. Un biaha mas nos ta ripiti cu hobennan kier wak ehempel pa nan sigui jamando hende pa nombernan di bestia sigur no ta e caminda! Algun luna atras a sosode un caso cu un parlamentario masculino di AVP tawata rebaha e parlamentarionan femenino di MEP invitandonan pa wak su partinan intimo. Mi ta puntra mi mes ta den ki estado di decadencia nos ta?! Hustamente riba e tipo di actonan aki pueblo lo mester bai husga ken si of ken no lo bai drenta parlamento.

No mester exclui e hecho cu pueblo ta desea tambe pa tin parlamentarionan responsabel den nan trabou cu ta studianan documentonan y preparanan mes pa cada debate of tratamento di ley . Si nos wak aprobacion di e presupuesto 2014 esaki mester wordo considera como un eror grandi den historia di Aruba pasobra parlamentarionan ciegamente a sostene cifranan cu tawata totalmente irrealistico y incompleto. Parlamentarionan a faya kinan di cuestiona y controla gobierno cual por wordo considera como incapacidad.

Loke mi a menciona ariba ta algun ehempel di con leu nos ta cu nos nivel en general. Ta pesei e ta importante pa pueblo ta critico cada eleccion pa no pone ken cu ta na un puesto asina importante. Como hoben politico mi ta spera cu algun dia nos por mira un parlamento di NIVEL halto unda cu tur representante di pueblo lo sa di siguinan reglanan, ta alcaso, comportanan mes, respeta otro, demostra responsabilidad y compromiso cu nan trabou.

Expresionnan haci den e articulo aki no necesariamente ta refleha opinion di ArenaPoliti.co