Den e prome reunion di Comision fiho di Economia y Finansa cu Minister di Finansa y Organisacion Gubernamental, miembronan di parlamento a haya un cantidad di informacion relevante riba situacion financiero y informacion valioso riba e presupuesto 2015. E presupuesto lo wordo trata den den Parlamento asina cu Conseho Consultativo (Raad van Advies) caba di haci su analisis y duna su conseho. E reunion cu e minister tabata e prome den un serie di reunion cu e Comision Economico y Financiero bou presidencia di Chris Dammers lo tene den preparacion pa tratamento di e presupuesto den Parlamento.

REDO vs ARGUMENTO
Prome, durante y despues di e reunion cu e minister, a resulta cu oposicion no tabata tin nada otro cu redo riba e cifranan real di economia, finansa publico y economia. Den nan expresionnan den prensa - corant, internet, radio, television y facebook - miembronan di oposicion ta sigui nenga di papia di e cifranan real, di e crecemento economico, di e maneho di corto y largo plazo pa reforma aparato di gobierno y finansa publico. Den e prome reunion a resulta cu oposicion a haci preguntanan cu meta politico, pero a haya contestanan cu nan no por usa politicamente. Ni contra e minister, ni contra di e maneho financiero. Mas ainda a resulta den nan reaccion den prensa, cu oposicion ta keda usa redo enbez di realidad. Obviamente oposicion no tin un idea con pa atende cu e desaroyo di Aruba awor aki. Pa e motibo aki nan ta keda pega den redo y gañamento. Nan speransa ta cu nan redo y gañamento lo crea malcontento, duda y inseguridad den comunidad y asina destabilisa nos pais. Enbez di contribui na bienestar di nos pais, oposicion ta scohe pa sembra inseguridad y discordia. Un bashi cu ta mustra cu Aruba di berdad merece un miho oposicion!

PUNTO DI BISTA DI AVP
AVP a scohe pa un maneho pa recupera Aruba for di e crisis cu MEP a bay laga Aruba aden. E maneho aki a duna e resultado cu a fiha como meta: mehora forsa di compra, pone economia crece atrobe, baha desempleo y crea mas cupo di trabou, inverti den pais y pueblo y restaura institucionnan y confiansa den nos pais. Tur cosnan cu MEP a bay laga na werki! Den apenas 4 aña a logra tur esaki. Pa e reforma financiero publico cu ta necesario, ya na 2010 a cuminsa tuma accionnan concreto. Un bon ehempel ta e sistema di pensioen. Hasta e raport di CFT ta referi na e importancia di esaki. Awe e fondonan ta riba bon caminda pa solidez desea. Pensioen di tur hende den futuro ta sigura atrobe. E maneho pa e añanan cu ta bin ta pa gradualmente reduci e deficit y debe di Aruba, sin perde loke nos a logra pa nos pais den e añanan cu a pasa. Kita hende fei trabou sin duna alternativa no ta yuda. Corta gasto sin wak e consecuencianan no ta yuda. Inverti, pone economia crece y crea entrada pa famianan si ta yuda. Tur hende cu kier contribui na e reforma gradual y stabiel aki ta mas cu bon bini. Critica y argumento constructivo ta bon bini. Redo y gañamento di oposicion sigur no ta yuda. 

Expresionnan haci den e articulo aki no necesariamente ta refleha opinion di ArenaPoliti.co