Pakico e no ta sosode?

"Enbez di mester fia placa manera tur otro pais na un interes di 5 pa 6%, Aruba por haya fiansa internacional na 1.6% pa 2%. Esaki lo yuda enormemente pa reduci e deficit riba presupuesto mas lihe y asina yega e punto di paga e debenan acumula den ultimo 28 aña mas lihe". E desicion aki ta depende di gobierno Hulandes. Rene Herde': "Nos ta den Reino pa yuda otro. Esey ta e principio riba cua a basa e Statuut 60 aña pasa: cada uno riba su propio forsa, pero cu e deseo di yuda otro. Si di berdad kier yuda Aruba pa sigui cu e crecemento economico y sigui mehora calidad di bida pa tur hende na Aruba, por dicidi di haci esaki."

FIANSA vs SANEAMENTO DI DEBE
Aruba nunca a pidi pa Hulanda paga debe di Aruba. Tampoco pa sanea e debe di Aruba manera a haci pa Corsow y Sint Maarten na 2010. Awor aki tampoco ta pidi pa esey. Loke si lo ta bon ta si Hulanda lo a habri e porta pa Aruba haya fiansa na un interes abou riba mercado internacional. Hulanda por haci esaki como e pais amigo di Aruba riba mercado internacional. Esaki no lo costa Hulanda nada. (= Esaki ta palabra di politiconan Hulandes mes!) Pasobra Aruba mes lo paga e fiansa bek, mescos cu Aruba a haci durante di e 28 aña cu a pasa sin hera niun pago! E temor cu algun hende na Hulanda tin pa e reputacion Hulandes internacional tambe ta wordo elimina cu un fiansa asina, pasobra e ta reduci cualkier riesgo financiero awor y den futuro. Aruba riba su propio forsa lo paga cualkier fiansa bek. Pero e bentahanan ta grandi: lo reduci e deficit mas lihe. Lo yega e punto di paga e debenan di 28 aña mas lihe. Tambe Aruba lo keda cu mas placa pa sigui inverti den Aruba y sigui contribui na crecemento economico y social di nos pais.

INVERSION TA CRUCIAL
Niun economia por crece sin haci inversionnan. Entre 2009 y 2014 gobierno di Aruba a inverti hopi placa publico pa saca nos economia for di crisis y pon'e crece atrobe. Ora economia crece, e ta crea mas cupo di trabou y mas entrada pa companianan. Ora companianan crece nan por crea mas cupo di trabou. Ora mas hende traha nan mes ta gana nan entrada y no tin cu depende di programanan social di gobierno. Inversionnan pesey ta bon pa tur hende y tur sector di pais. Despues di añanan di austerisacion (= cortamento di gasto sin fin) paisnan di Europa ta busca tur forma pa inverti y pone nan economia crece. Nan pueblonan ta fada di e problemanan social cu e maneho di austerisacion a crea y nan ta bou presion pa trece alivio. E maneho di Gabinete Mike Eman I y II ta esun cu awor paisnan Europeo kier bay hiba, pasobra ela demostra di duna resultado. Awe Aruba ta mas leu y e forma pa sigui crece y crea trabou, ta pa inverti den enseñansa, infrastructura, reforma di gobierno y haci Aruba ainda mas atractivo pa haci negoshi. E solucion ta den re-financia e debe di Aruba cu un fiansa cu interes abou. Hulanda por haci'e. Pakico no?

Expresionnan haci den e articulo aki no necesariamente ta refleha opinion di ArenaPoliti.co