E "KB" ta e eror mas grandi den Reino di 2014

Aña 2014 tabata dificil den hopi sentido. Enbez di kier lubida e aña aki mas lihe posibel, lo ta miho pa nos compronde bon kico a sosode, pakico ela sosode y con pa preveni ripiticion den futuro. Pa mi un di e cosnan cu a marca e aña 2014 ta e desicion di gobierno Hulandes pa interveni den gobernacion di Aruba via un Decreto Real (KB). Na fin di e aña, despues di tur raport, tur analisis y tur discucion, nos por conclui cu e desicion aki tabata innecesario, inefectivo y illegal. Esaki ta haci'e e eror mas grandi den Reino pa e aña aki. 

INNECESARIO
Gobierno Hulandes no tabata di acuerdo cu e maneho financiero di gobierno di Aruba pa recupera for di e crisis, door di stimula economia y crea un desaroyo socialmente y financieramente balansa. Gobierno Hulandes ta wak finansa publico den forma isola, mientras cu gobierno di Aruba sosteni pa e fraccion di AVP, tabata wak desaroyo social, economico, laboral di henter nos pais. Embez di wak e proceso di sanea organisacion y finansa publico cu gobierno y parlamento di Aruba a propone y sostene esaki, Gobierno Hulandes a dicidi di "by-pass" Parlamento di Aruba, wanta e presupuesto y laga haci un envestigacion riguroso di finansa publico. E raportnan di CFT a demostra cu e "KB" tabata innecesario. Loke gobierno Hulandes (y oposicion na Aruba) a kere, cu lo sali for di e envestigacion, no a resulta. E desaster financiero, e uso illegal di placa di pueblo pa metanan politico y innecesario, no a resulta. Tur loke CFT a analisa y propone, tabata planea caba. E intervencion tabata innecesario.

INEFECTIVO
Ora como gobernante of gerente bo tuma desicion riba cua tereno cu ta, bo ta percura pa e desicionnan tin e efecto maximo y cu tin menos consecuencianan indesea posibel. E intervencion di gobierno Hulandes door di para ehecucion di e presupuesto 2014, tabata tin consecuencianan masha negativo pa nos pais. Gobierno di Aruba cu tur aña ta e inversionista mas grandi den economia di Aruba cu mas cu un biyon florin, no por a haci loke e tabata tin planea. E ehecucion di proyectonan a sufri tardansa. Companianan di construccion y companianan chikito cu ta haci tur sorto di trabou pa gobierno, den departamentonan manera di enseñansa, den infrastructura y comercio mes a sufri di e consecuencia negativo. E "inversion" di placa di gobierno den nos economia a tarda y a stagna e desaroyo planea. E intervencion a causa inseguridad tambe serca inversionistanan. Esaki a causa tardansa den ehecucion di proyectonan den sector priva cu "tabata warda pa wak kico ta bay sosode". Tur esaki ta mustra cu e intervension tabata inefectivo.

ILLEGAL
E mas tristo di e "KB" ta cu e ta illegal. Ministernan Plasterk y Rutte a purba splica cu nan ta haya cu nan a actua legal. Pero te awe no tin un experto den henter Reino cu ta duna nan rason! For di e prome momento huristanan di derecho estatal, profesornan y te hasta ex-minister di Asuntonan di Reino a bisa cu e "KB" ta illegal of diplomaticamente a bisa cu nan "tin duda serio" den e legalidad di e intervencion. Ta tristo pa wak con enbez di sigui e caminda usual y mas efectivo di dialogomanera semper ta haci den Reino, a scohe pa impone nan boluntad na un forma illegal. Den un caso recientemente na Hulanda, e mes un gobierno Hulandes a menasa di introduci un ley sin pasa parlamento usando un Decreto Gubernamental (AMvB). Esaki corectamente a wordo cualifica como 'bora un buraco den bom di e estado di derecho'. Mescos ta conta pa e "KB" den caso di Aruba. E actuacion illegal di gobierno di Hulanda a wordo critica y lo sigui wordo critica como indemocratico y illegal. Mas ainda como cu ta viola e autonomia financiero di Aruba cu ta ancra den Statuto di Reino.

For di e analisis aki di 2014, nos mester siña pa futuro!

Expresionnan haci den e articulo aki no necesariamente ta refleha opinion di ArenaPoliti.co