Nos a tuma nota di fayesimento di sr. Hubert Booi, baluarte di cultura di nos pais. Otro baluarte cu ta bandona e bida aki pa bai den Reino di Dios.

Sr. Hubert Booi lo wordo recorda sigur como esun cu a haya e encargo di sr. Betico Croes den felis memoria, pa hasi e sonjo di nos pueblo un realidad, di tin su propio himno. Sr. Booi tabata co-autor di nos Himno Nacional “Aruba Dushi Tera”. Y manera cu nos por corda, e tempo ey e himno a wordo critica pa oponentenan di gobierno insular di Aruba, cu hasta a vota contra e himno. Pero tanto sr. Booi como sr. Betico Croes den felis memoria tabata sa cu e anhelo di nos pueblo di tin su simbolo di libertad, su propio himno, ta mucho mas grandi cu cualquier oposicion politico, y danki na nan perseverancia awe ya pa 38 anja nos ta bati cu orguyo riba nos pecho cu nos tin nos propio himno.

Sr. Booi lo wordo recorda tambe pa e hecho cu sr. Betico Croes na anja 1978 a encarga sr. Booi pa prepara y funda nos Instituto di Cultura, y tabata e prome director di e instituto aki, cu awe ainda ta hasiendo hopi trabou den sostene y engrandese nos cultura.

Un musico, actor, poeta, y pintor hopi stima den nos comunidad. Aruba sigur lo sinti su falta, pero alabes nos ta sumamente agradecido na nos bon Dios di a bendiciona nos cu un persona asina talentoso, cu a sa di marca pasonan cu hamas por wordo lubida.

Den nomber di partido Movimiento Electoral di Pueblo, mi ta desea e familiarnan di sr. Booi hopi forsa. Cu sr. Hubert Booi sosega na pas den brasa di Senjor, y cu Senjor duna su yiunan, nietonan y demas famia hopi forsa den e dianan aki.

Expresionnan haci den e articulo aki no necesariamente ta refleha opinion di ArenaPoliti.co