Parlamento ta stroba Oposicion di funciona!

“Parlamento di Aruba no ta funciona, nos pais merece mihor. Reunionnan cu fraccion di MEP ta pidi pa trata temanan urgente, ta wordo stroba door di presidente di parlamento, y esey ta stroba nos fraccion di controla gobierno mihor. Si e fraccion di AVP no kier controla gobierno, esey ta nan asunto, pero no stroba nos tambe. Fraccion di AVP kier yama solamente reunionnan cu nan ta haya di gusto, y despues ta keha cu nos no ta asisti. Pero e reunionnan cu nos ta pidi, no ta ni wordo yama!” Lider di MEP Evelyn Wever-Croes a duna di conose.

Ta trata di varios reunion cu ya mas di un anja a wordo pidi pero no ta wordo duna na e fraccion geel. Dia 7 feb. 2014 a pidi pa trata Desaroyo alarmante na Horacio O. Hospital, pero no a wordo yama. Dia 24 maart 2014 a pidi pa trata Tiara Air, tampoco a wordo yama. Dia 26 maart 2014 a pidi pa trata Dump na  Santa Cruz cu urgencia, y esaki a wordo yama dia 16 april 2014, pero suspendi mesora, y nunca mas a yame. Mientras tanto habitantenan ta biba den ansha sin sa kiko lo pasa. Dia 26 maart 2014 a pidi tambe pa trata e Centro di adicto na Savaneta, e Proposicion di ley di Bosman, y e Peliger di asbest na Pos Chikito, pero no tin ningún interés di parti presidente di parlamento pa yama esakinan.

Dia16 mei 2014 a pidi pa trata e Intencion di gobierno y Serlimar pa cobra pa recohe sushi, pero e no a wordo yama. Tambe a pidi pa trata Retiro masal di contractanten den gobierno, y e destino di Valero, sin oido. Dia 9 juli 2014 a pidi pa trata e proyecto di Hard Rock Hotel, pero nada. Dia 8 okt. 2014 a pidi cu urgencia pa minister di husticia bin duna cuenta di e abuso policial durante e manifestacion dia 1 oktober 2014, pero ni esaki e presidente di parlamento a haya necesario pa yama ainda. Finalmente tin e reunión cu fracción di MEP a pidi pa trata dia 12 jan. 2015tocante Prijs di crudo y su efecto riba prijs di coriente; esaki a wordo yama dia 22 jan. 2015, pero suspendi te awe ainda. Den total tin 12 reunion cu Fraccion di MEP ta wardando riba dje den e ultimo anja aki so, y e presidente di parlamento ta mustra cu e no tin ningun interes pa yama nan.

SOLUCION
“Nos lo denuncia e violacion di nos democracia na tur instancia internacional, pasobra esaki ta abuso caba. Pa Parlamento funciona manera debe ser, mester otro presidente di parlamento. E presidente actual tin un envidia infantil contra nos partido y esey ta strob’e di funciona, y ta stroba funcionamento di henter Parlamento. Aruba merece un Parlamento cu ta funciona debidamente, cu ta controla gobierno, y nos compromiso ta pa brinda Aruba esaki”, segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co