Ora un hende usa e placa cu ela traha duro pe y cumpra algo of haya un servicio cu e kier pa su placa, e por bisa cu ela usa su placa bon. Pero si e no haya nada bek pa su placa, e ta sinti su mes defrauda y cu rason lo keha. Esaki parcialmente ta conta pa paisnan tambe. Si e placa di e pais wordo usa den forma cu pueblo ta wak unda su placa a bay, ora e ta sinti cu ela haya algo bon bek pa su placa, ora e sinti cu ela bay dilanti, e placa a wordo bon usa. Pero ora e no haya nada bek y no sinti unda su placa a bay, cu rason e ta desaproba esey. E unico diferencia ta cu niun hende kier perde nada of bay atras niun tiki. Entrega no ta algo cu niun hende kier. Pesey ta comprendibel cu ora pidi pa tur hende duna un tiki pa hunto paga pa por ehempel e seguro medico pa tur hende na Aruba, hende ta bira incomodo of hasta rabia. Hasta si e ta wak kico e ta haya bek pa su placa: un seguro medico pa cubri tur e gastonan medico pa tur hende na Aruba! Algo cu poco pais na mundo tin! Esaki ta un inversion y no un malgastamento di placa. Mehora forsa di compra di trahadornan ta un inversion den hende y den economia. Fortifica fondonan di pensioen ta un inversion pa hende! Nan ta haya un pensioen sigur pe den futuro ora nan no por traha mas.

MALGASTA
Oposicion ta yama e maneho financiero di gobierno "malgastamento di placa". Pero si nos wak unda e placa di pueblo a bay for di fin di 2009, nos ta wak cu e placa a bay pa saca e fondonan di pensioen for di bancarota caminda nan tabata na 2009. Entre 2009 y 2014 a inveri mas cu 300 miyon florin pa e fondo di pensioen di trahadornan di gobierno, polis, duane, maestronan di scol, trahadornan den companianan di gobierno, etc. A debolbe trahadornan di gobierno, maestronan di scol, polis, duane, etc e indexering y ahuste di salario den forma di bashi premie, "gelijk bedrag", y pa hopi, nan salario tambe cu a keda wanta pa mas cu 7 aña. A introduci e "reparatietoeslag" pa pensionadonan di SVB y pa tur e trahadornan den sector priva cu un salario bou di 2500 florin. Tur esaki for di caha di gobierno. A mehora e onderstand y e ayudo na mamanan soltera y placa pa nan jiunan keda den scol. Anto esaki no ta djis pa un aña. E ta pa tur aña for di 2010/2011. Esaki ta sin conta loke gobierno a keda sin haña door di corta e belasting riba benta di negoshi na mitar. Esey so a costa gobierno 80 miyon pa aña. Tur esaki tabata parti di e maneho pa mehora forsa di compra cu a cay entre 2001 y 2009 cu 25%. Esaki ta, entre otro, loke Oposicion ta yama "malgasta placa di pueblo". Rene Herde':"Mi no por compronde con bo ta bisa trahadornan cu a bay atras y a keda sin haya indexering pa 7 aña di MEP, cu loke gobierno di AVP a haci desde 2009, ta malgasta placa. Pero si bo puntra MEP unda e mas cu 1.8 biyon forin (1.800.000.000) a bay y pa mustra pueblo kico pueblo a haya pe, nan ta bisa bo pa no wak den pasado. En realidad nan no por y no kier duna cuenta!"

Expresionnan haci den e articulo aki no necesariamente ta refleha opinion di ArenaPoliti.co