Despues cu e lider di fraccion di AVP Baba Herde pa simannan largo a trata di manipula mente di pueblo cu e mentira cu ta partido MEP ta e autor principal di e presencia di CFT na Aruba y cu riba esaki MEP den forma contudente y cu pruebanan palpable a desenmascara e mentira aki di Baba Herde, awor e mesun Baba Herde aki kier purba bolter cos bisando cu “MEP ta inventa storia y ripiti nan, te kere nan”. Sinembargo den su comunicado - sin pia y sin cabez - Baba Herde no ta trece ni un solo ehempel padilanti di mentiranan cu partido MEP supuestamente lo a lansa durante e ultimo tempo aki. Esaki no ta posibel tampoco ya cu cada vez, un tras di otro dirigente y parlamentarionan di MEP ta lanta e tapa di e poz, caminda pueblo mes ta testigo con malo e gobierno di AVP ta gobernando e pais aki, tambe den forma intrasparente, yena di fraude y corupcion. Lamentablemente Ministerio Publico pa motibonan incomprendibel nunca no kier a acepta tur e denuncianan cu MEP a haci, corda pa nan investiga tur e actonan coruptivo aki.

Algun mentira di AVP
Pero locual ta mas remarcabel ainda ta cu Baba Herde ta trece e asunto di inventa mentira padilanti, lubidando cu e partido mas mentiroso den historia di Aruba y cu lo bay den Guinness Book of Records ta su partido AVP. Aki MEP kier a refresca memoria di Baba Herde pa algun di e mentiranan di su partido AVP:

1. Ta cual partido a priminti pueblo cu asina nan drenta gobierno cu nan lo elimina e BBO di 3% completamente?
2. Ta cual partido a priminti pueblo cu den e promer aña di nan gobernacion nan lo reduci e tarifa di awa y coriente cu 25.5% y den e siguiente aña un reduccion cu 25.5% mas?
3. Ta cual partido a priminti pueblo cu nan lo tene e refineria Valero habri, pero despues nan mes a regala e multinational aki 76 miyon florin y tambe e haf y e transshipment terminal?
4. Ta cual partido a priminti cu nan lo pone moratorio pa construccion di mas hotel, pero toch ta den proceso pa yena e pais aki cu mas y miles di camber hotel timeshare?
5. Ta cual partido a priminti tur mucha di school basico cu nan lo haya regalo di un laptop pa nan estudio y cu te ainda e muchanan ta wardando riba esaki?

E lista di mentiranan di AVP ta increiblemente largo y pa e biaha aki MEP ta trece solamente 5 ehempel di e mentiranan aki  padilanti. Ta pesey lo ta bon pa Baba Herde puntra su lider Mike Eman, pakico su persona cu tur ‘honor’ ta carga e apodo di Pinochio den pueblo?

Aumento di debe cu 400 miyon
Finalmente lo ta bon pa Baba Herde puntra su mes dicon su gobierno di AVP constantemente ta declara cu nan maneho financiero ta pa reduci e deficitnan financiero y consecuentemente reduci e debenan di pais Aruba den e proximo añanan, pero cu toch e debenan aki ta sigui subi? Adhunto partido MEP ta trece un grafico padilanti compila for di e propio cifranan di Gabinete Eman den cuadro di presupuestonan di mas aña aproba na December ultimo, caminda un y tur por mira cu durante e periodo di 2014 te cu 2018 nos debenan nacional lo subi y sigui subi, for di 3.9 biyon na 2014 te cu 4.3 biyon na 2018 (Aumento cu 400 miyon florin!).  Y esaki teniendo na cuenta tur e 24 medidanan cruel cu Gabinete Eman ta cla pa impone riba lomba di pueblo! Awor lo ta bon pa Baba Herde splica pueblo, ken ta papia e mentira y ken ta papia e berdad relaciona cu e crecemento di nos debenan nacional den e proximo añanan?