"Nos kier wak iniciativa y proposicionnan di ley a corto plazo!" 

Fraccion di AVP ta di acuerdo cu casi tur e prioridadnan cu ATIA ta propone den e relato di prensa emiti recientemente. Aumento di productividad y reforma fiscal en particular! E argumentonan pa fraccion di AVP ta cu e maneho pa sali di e abismo economico, financiero y social causa door di e tres crisisnan na fin di añanan 90, no por ta e mes un maneho di pasado cu a contribui na e crisis. E reformanan cu nos fraccion a y lo sigui sostene, ta solucionnan cu un efecto structural y duradero, cu lo contribui realmente na logra finansa publico balansa y duradero, na crecemento economico continuo, na aumento continuo di inversion di sector priva den areanan economico nobo of den mehora calidad di trabou, servicio y rendimiento den sectornan existente, den creasion di cuponan di trabou nobo cu ta paga bon salario.

PRIORIDAD
Pa logra esaki nos ta convenci y di acuerdo cu ATIA cu mester aplica diferente instrumento riba diferente tereno simultaneamente. Reforma fiscal structural cu ta amplia e base di entrada di gobierno y reduci e peso di impuesto riba trahadornan y companianan ta essencial. Esaki lo haci inversion den nos economia mas atractivo. Pero na caminda e mehoracion di entrada di trahadornan mester ta parti di e reforma aki tambe. Analysis economico ta mustra cu si no acopla mehoracion di reparticion di entrada den comunidad na reformanan fiscal y economico, crecemento economico ta stanca na caminda. Entradanan nobo cu surgi mas oro di crecemento economico y rendimiento di companianan, mester wordo inverti tambe den mehora condicionnan di trabou di trahadornan, den miho oportunidad pa nan crece den nan carera y den mehora nan entrada. Esey ta conta specialmente pa trabounan na nivel medio y basico den sector priva!

Un di e otro instrumentonan cu tin prioridad pa stimula crecemento economico duradero ta aumento di productividad. Esaki mester sosode den forma structural y e mester bira un aumento continuo. Pa logra esaki mester inverti mas den recapacitacion den tur sector y na tur nivel, di companianan y departamentonan di gobierno. E recapacitacion mester ta structural y continuo, pa evita cu ta sigui pidi pa trece hende di exterior cu e argumento cu no lo por haya hende cu e conocemento aki na Aruba. Pesey mester inverti den enseñansa na scol den forma specifico, den companianan mes, via "Enseñansa pa Empleo" y otro institutonan cu e meta pa structuralmente y significantemente capacita nos trahadornan na tur nivel y den tur sector, pa nos por ta mas efectivo y mas productivo den cualkier trabou. E ta nifica tambe creasion di oportunidad pa nos trahadornan por crece den nan compania y no keda pega y wak otro hende pasa riba nan cabez. E ta ensera tambe cambio di e sistema di compensa trahadornan, pa un sistema cu ta basa riba nan productividad y motivacion mas halto. Trahadornan mester ripara concretamente cu nan esfuerso pa hiba nos pais dilanti, pa ta mas productivo y efectivo den nan trabou, tin resultado pa nan mes tambe na fin di dia. 

Expresionnan haci den e articulo aki no necesariamente ta refleha opinion di ArenaPoliti.co