Reforma di pensioen. Reforma di belasting. Reforma di finansa. Reforma di economia. 

E tabata masha cla na comienso di e crisis financiero y economico na fin di 2007, cu hopi cos mester a cambia na Aruba y den mundo. Aruba no tabata prepara pa resisti un crisis di e magnitud cu a dal nos. Aunke e entradanan tabata halto, no a crea niun reserva. Al contrario. E fondonan di pensioen tabata bay bancarota y corupcion a enrikese un grupito. (Tur esaki ta bon documenta!) E shete aña anterior a bay perdi. Nos economia a crece, entrada a crece, pero desempleo tambe a crece y pueblo a bay atras den forsa di compra y den perspectiva pa futuro. Seguridad social a bay perdi. Na fin di 2009 tabata mas cu cla cu cos mester a cambia. Gobierno di AVP a cuminsa cu e programa di reforma pa renoba y fortifica nos pais. Pero e reforma mester a haci mas cu djis cambia sistema y structuranan. Tur e cambionan den e programa extenso di reforma mester a beneficia pueblo den su forsa di compra,  den su calidad di bida, den su perspectiva pa futuro, den mas y miho oportunidad pa nos hobennan y mas stabilidad pa nos pais.

REFORMA GRADUAL
Entre october 2009 y awe diferente reforma a start y ainda falta hopi! E reformanan cu ya a tuma luga a demostra nan bon resultado. Tambe e reforma di finansa publico ta cana bon, aunke falta hopi pa haci. E resultadonan di e ultimo raportnan ta demostra esey. Gobierno di Reino a aproba e fiansa internacional pasobra e maneho financiero ta cuadra cu e normanan palabra pa baha e deficit y despues cuminsa paga debenan di ultimo 28 aña. Standard & Poors a caba di evalua finansa publico y a confirma e posicion di Aruba (S&P a bisa: "We are affirming our 'BBB+/A-2' sovereign credit ratings on Aruba. Our stable outlook reflects our view that continued GDP growth and a gradually improving fiscal position will stabilize Aruba's debt burden and sustain external liquidity.") E comision di CFT a confirma cu Aruba ta cumpli cu e normanan fiha, aunke nan manera semper ta keda critico. E reforma di pensioennan cu a cuminsa na 2010 a salba e fondonan di pensioen y a sigura cu tur pensionado di AOV y APFA lo sigui haya nan pensioen manera nan ta conta riba dje. E reforma di belasting cu ta cuminsa na januari lo fortifica entradanan di gobierno y reduci e nivel di belasting pa tanto e trahado y su famia, como e doño di trabou. E reforma di nos economia, cuminsando cu e reforma di turismo ta duna resultadonan, cu hasta cu e refeneria sera, nos pais ta sigui crece. E sectornan nobo di nos economia manera e "hub", e sector di energia "berde", e reduccion di costo di energia door di uzo di energia renovabel y e crecemento den calidad di turismo, ta demostra cu e maneho di reforma di AVP ta duna e resultado desea.

Pero nos no ta cla. Ainda falta! E proyectonan di renobacion di waf di Playa y di Barcadera, construccion di e "Green Coridor" y Avenida Watty Vos, e creasion di un centro di innovacion, lo contribui significantemente den reduci costo di haci negoshi y lo habri oportunidadnan nobo pa desaroyo economico cu lo crea mas trabou.

Rene Herde': "Reforma no ta facil. Esey a keda demostra e cinco aña cu pasa. Hasta partnernan serca ta bira nervioso y haci cosnan straño cu ta stroba. Pero nos ta sigui cu e reforma di tur area di nos pais cu ta necesario, pasobra e ta bon pa nos pais y pa nos hendenan. E criterio final di tur loke nos haci ta nos hendenan. Nan mester wak y sinti cu nan ta bay dilanti di berdad. Esey ta e caso. Pesey e reforma ta sigui!"

Expresionnan haci den e articulo aki no necesariamente ta refleha opinion di ArenaPoliti.co