Den un entrevista hasi cu e hoben politico sr. Gerick Croes e la elabora riba e topico di belasting referiendo na e hecho cu gobierno a intensifica cobransa di belasting. Ademas di esaki sr. Croes a splica riba e posibilidad cu cada cuidadano tin pa tur fin di luna sobra mas placa cash di nan salario door di hasi un peticion pa "loonvermindering". Remarcabel ta cu esaki ta un opcion existente caba pero segun e hoben politico hopi cuidadano te dia di awe no ta hasiendo uso di dje. Sr. Croes a declara lo siguiente: "Un di e medidanan cu Gabinete Eman tin riba su lista ta e instensificacion di cobransa di belasting. Esaki sigur ta cuestionabel pasobra ainda no a optimalisa e proceso di pago di restitucion atrasa. E realidad ta cu te ainda e cuidadano pagador di belasting no a haya nan placa bek di aña 2010. Algo cu mester wordo considera como un abuso pasobra si abo debe belasting si bo mester paga mesora, pero si bo tin cu haya placa bek, abo mester keda warda añanan largo.Esaki atrobe ta tipifica e maneho di Gabinete Eman"hancho pa nan smal pa e cuidadano".

Paga belasting ta un deber sagrado di tur cuidadano, pero pagamento dimas no ta necesario. En conexion cu esaki nos kier recomenda tur cuidadano pa hasi uso di "loonvermindering" specificamente den caso di gastonan grandi relaciona cu hipoteca of otro prestamo. Esnan cu ya caba ta conoci cu e posibilidad aki sa cu e ta hopi conviniente pasobra bo ta paga loke bo debe (no dimas) y ta keda cu extra placa. Cu "loonvermindering" e ta posibel pa medio di un calculacion hasi den adelanta baha e suma cu bo dunador di trabou ta retene na loonbelasting pa asina tur fin di luna abo tin mas placa "netto" den bo man. Pa bai mas den detayes e calculacionan cu ta wordo hasi ta tene cuenta cu entre otro gastonan di hipoteca y otro tipo di prestamo. E deduccion di e gastonan aki ta pone cu automaticamente e base pa cobra loonbelasting/inkomstenbelasting lo bira mas abou y consecuentemente bo lo paga loke ta husto.

E formulario aki bo ta haye riba e website di departamento di impuesto. Ora di lesa e formulario bo lo nota cu tin seccionan destina pa entre otro datonan personal, espacio pa bo dunador di trabou y pa departamento di impuesto. Ta importante pa e cuidadano sigui e instruccionan y pidi e documentonan corespondiente (por ehempel carta di interes original) pa asina e peticion por wordo documenta manera debe ser y procesa na ordo pa finalmente por paga menos loonbelasting tur luna. Hecho ta cu loonbelasting ta un "voorheffing" (retencion den adelanta) dibo inkomstenbelasting y den e caso aki "loonvermindering" lo por tin efectonan significativo riba bo payslip.

Sin duda algun esaki ta e mihor opcion cu e cuidadano tin awor, pasobra si mester bai warda te ora cu bo cobransa (aanslag) definitivo wordo regla kizas hopi aña a pasa caba. "Loonvermindering" ta hasie posibel cu for di awor (of e lunanan siguiente) bo por tin mas placa den bo man. Mi ta spera cu tur cuidadano por hasi uso di e opcion aki pasobra den e temponan aki no ta cumbinibo paga nada dimas. E extra placa cu bo lo bin cas cune pa luna mi ta sigur cu cada cuidadano lo hasi bon uso di dje, tawata palabranan di e hoben politico sr. Croes.

Expresionnan haci den e articulo aki no necesariamente ta refleha opinion di ArenaPoliti.co