Diaranson atardi Minister di Finanzas a ricibi Sr. Michel Henriquez, Sr. Igmar Reyes y tambe Sra. Mireille de Miranda di Aruba Trade and Industry Association (ATIA) pa papia tocante e ultimo desaroyonan y tambe aclaria cualkier duda cu e miembronan di ATIA a manifesta den e ultimo tempo.

E mandatario a bisa cu en berdad pa final di aña pasa, Gobierno a traha bou di hopi presion, principalmente debi na e situacion cu a presenta caminda cu e presupuesto 2014 no a wordo firma desde e prome instante. Sin embargo mirando cu e presupuesto 2015 ta duna continuidad na e palabracionnan y adaptacionnan den e version supletorio di 2014, Minister di Finanzas no ta spera cu lo presenta mesun obstaculo atrobe.

No obstante, e concepto di e presupuesto 2015 a wordo entrega caba na Sr. Gobernador pues mientras tanto mester warda pa un fecha pa e wordo trata den reunion publico, despues cu Raad van Advies tambe duna su opinion.

E representantenan tabata tin varios pregunta tocante College Financieel Toezicht (Cft), pa loke Minister Bermudez a informa cu e tambe a tuma nota di e ‘promotional tour’ cu e colegio aki a haci durante e ulitmo dianan na Aruba.

En general e reunion a bay den bon ambiente y sigur a logra aclaria varios pregunta cu e representantenan di ATIA a trece padilanti pa loke ta trata entre otro e maneho pa 2015 y e reforma fiscal. Den varios ocasion e mandatario di Finanzas, a expresa cu e semper ta habri pa reuni cu cualkier organisacion, gremio of sindicato, pues transparencia y bon comunicacion ta fundamental awendia pa logra un bon gobernacion.

Expresionnan haci den e articulo aki no necesariamente ta refleha opinion di ArenaPoliti.co