Diabierna siman pasa den oranan di marduga e presupuesto supletorio 2014 a keda aproba den parlamento. Despues di un trayectoria basta largo, Diamars atardi Minister di Finanzas, Angel Bermudez a ricibi e presupuesto 2014 y e supletorio cu firma di Sr. Gobernador Fredis Refunjol, pues e proceso aki a keda conclui y awor e mandatario conhuntamente su conseheronan por continua riba e presupuesto 2015.

Varios ahustacion a wordo inclui den e presupuesto adapta 2014 cu ta basa riba e recomendacionnan cu e expertonan di e Secretariaat di College Financieel Toezicht (CFt) a entrega na e mandatario di finanzas. Entre nan ta e deposito di 170 miyon florin den e fondo di pensioen di APFA, e reservacion pa e fondo di AZV y por ultimo un suma di 10 miyon florin pa diferente categorianan cu ta indica cu lo surpasa e suma presupuesta.

Minister Bermudez ta contento cu a logra finalisa e proceso completo di e presupuesto 2014 y e supletorio e aña aki ainda y ta sigura cu pronto lo continua cu e detayenan riba e presupuesto 2015 pa asina entrega esaki na tempo manera ley ta stipula y finalisa esaki den inicio di 2015 y no na fina di aña atrobe.

FIN

Expresionnan haci den e articulo aki no necesariamente ta refleha opinion di ArenaPoliti.co