"Nos a scohe concientemente pa saca nos pais for di e pos profundo cu nos tabata aden na 2009. Nos scohe concientemente pa pone economia crece, crea cupo di trabou, cuminsa un desaroyo social nobo y inverti den forsa di compra di esnan cu a keda atras pa hopi aña. Awor cu nos a cuminsa reorganisa finansa publico y e aparato di gobierno, nos lo sigui cuida esnan den mas necesidad prome. Bou tur circiunstancia tin dos meta crucial cu nos lo tene na dje. Nan ta pa percura pa nos pais sigui bay dilanti den forma balansa y semper cuida esnan den mas necesidad. Esey ta loke nos di AVP a scohe pe y ta sigui traha pe." Asina e lider di fraccion di AVP a bisa awe den conferencia di prensa pa splica un biaha mas e maneho cu e fraccion y e partido AVP ta para pe.

BOU TUR CIRCUNSTANCIA
Un di e palabranan essencial den loke Rene Herde' a bisa ta "bou tur circunstancia". E mes ta admiti cu esaki ta un ponencia politico peligroso, pasobra niun hende por anticipa loke futuro ta bay trece. Rene Herde: "No. Niun di nos por wak futuro. Na 2009, ora cos no por tabata mas malo na Aruba, cu caha di gobierno tabata bashi, e refeneria tabata sera, turismo tabata cayendo, tabata tin mas cu 6 mil hende sin trabou y nan famia sin entrada y e fondonan di pensioen tabata casi bancarota, nos no a corta gasto y pone mas peso riba pueblo pa sali di e problemanan. Pasobra no tabata tin caminda pa corta y pueblo no por a carga mas. Nos a traha pa sali di problema sin afecta esnan cu no tabata tin. Awe nos lo bolbe haci esey. Nos lo haci tur lo posibel, tuma tur desicion necesario y responsabel pa sali for di tur situacion dificil, nos lo pidi sacrificio di tur hende, nos lo cuminsa den esey cu nos mes, pero semper nos lo cuida esnan cu no por duna of carga mas. Nos lo cuida semper e trahado cu un salario chikito y e pensionado cu un entrada chikito di pensioen di behez."

Cu esey Rene Herde tabata referi na e aumento di onderstand specialmente pa e mamanan soltera cu no tabata tin niun otro entrada y mester a cria nan jiunan cu menos di 400 florin pa luna.  E tabata referi pa e "reparatietoeslag" cu gobierno a dicidi di duna tur trahador den pacusnan, hotelnan, restaurant y oficinanan cu tabata haya un salario bou di 2500 florin. Tur e placa aki a sali for di presupuesto di gobierno for di aña 2011 y te awe ta sigui. Aunke e situacion financiero di gobierno lo sigui e proceso di baha gasto den añanan cu ta bin, semper lo busca forma pa cuida e entrada y servicionan publico pa esnan cu menos entrada. Ta pesey no a hisa e prima di AZV, pero a busca otro forma pa sigura cu e cuido medico di tur hende na Aruba keda mescos. Ta pesey a trece cambio den e fondonan di pensioen, pa sigura cu tur e pensionadonan awor y den futuro ta sigur di nan pensioen. E pensamento segun Rene Herde ta pa hunto duna un tiki pa haya seguridad pa cada un di nos awor y den futuro.

Expresionnan haci den e articulo aki no necesariamente ta refleha opinion di ArenaPoliti.co