Manera ta conoci fraccion di AVP y Gabinete Eman a aumenta BAZV cu 1% haciendo esaki 3.5%. E amienda presenta tawata inclui reduccion di e prima di AZV cu 1%. Realidad ta cu esaki ta nada ora bo trece tur cos den balansa. Enfasis mester wordo poni si riba e hecho cu BAZV pa di dos biaha ta conoce un aumento den un periodo di menos cu un aña. Banda di e hecho cu nan a kibra nan propio principio  door di keda cu e mesun structura (di no elimina) ta interesante pa pone atencion riba e desaroyo di otro medidanan riba tereno di AZV.

Contribucion propio
Cu bendicion di e promer dialogo social cu a tuma lugar na 2010 y tambe di parlamento e prima di AZV a conoce aumento entrante 1 januari 2011. E aumento tawata di 2% parti igual pa trahador y doño di trabou. Pa e pensionadonan esaki tawata mas pisa pasobra nan mester a carga e aumento completo debi cu nan no tin trabou. Tambe a papia abiertamente di introduccion di un "eigen bijdrage" pa AZV. Esaki kiermen cu pueblo lo mester bay haci pagonan adicional (extra) apart riba locual ta wordo paga na primanan reteni tur fin di luna. Netamente pa e motibo aki fraccion di MEP a haci preguntanan relaciona cu 1) cobransa di 3 florin pa cada remedi receta 2) 159 florin pa Eerste Hulp 3) 50 florin pa Huisartsenpost 4) si lo tin aumento di prima atrobe  y 5) inkrimping di e pakete basico di medicina.

Medidanan adicional
Minister di Salubridad no a duna contesta concreto riba kico lo bay sosode cu e medidanan relaciona cu eigen bijdrage. E minister en cuestion a laga sa cu el’a haya un documento di "kostenbeheersingsmaatregelen" cu AZV lo bay tuma y cu e ta di acuerdo cu nan pero cu no ta cla cu e discusionnan. El’a hasta anticipa cu aki poco tempo sigur lo tin remarca cu atrobe lo tin medida pero a tene corto bisando cu na su debido tempo e lo trece esaki padilanti. Tambe el’a indica cu no mester sigui baha e landsbijdrage di AZV. E minister kiermen cu bo por haci e eigenbijdrage pero na un forma responsabel. Pero pregunta ta con leu bo kier yega cu asina hopi medida?

Maneho deficiente
Ta obvio si cu e maneho financiero di gobierno ta uno deficiente cu ta afectando landsbijdrage na AZV nificando cu lo rekeri mas y ta pesey algun dia despues manera ladron den anochi a aproba pa aumenta BAZV entrante 1 juli 2015 cu 1% mas, despues cu esaki ya caba a conoce un aumento entrante 1 december 2014 ultimo.
Pa trece tur cos den perspectiva pueblo mester haci e siguiente preguntanan: e compensacion minimo di 1% ta den balansa cu tur e otro medidanan menciona? Aumento di BAZV lo hala eigenbijdrage for di mesa? Un cos ta sigur, no por sigui sconde y pueblo merece di por haya contestanan cla relaciona cu e medidanan adicional cu lo tin planea riba tereno di AZV. 

Expresionnan haci den e articulo aki no necesariamente ta refleha opinion di ArenaPoliti.co